ასეულობით ათასი ქალი გამოვიდა აშშ-ის პრეზიდენტის, დონალდ ტრამპის წინააღმდეგ ვაშინგტონის, ნიუ-იორკის, ლოს-ანჯელესის, ჩიკაგოს და ბოსტონის ქუჩებში. როგორც „როიტერსი“ წერს, ტრამპმა ბევრი ლიბერალი ამერიკელი გაანაწყენა თავის კომენტარებით ქალებზე, მექსიკელებსა და მუსულმანებზე, საზღვარგარეთ კი ბევრმა წუხილი გამოთქვა მის საინაუგურაციო მიმართვისას წარმოთქმული სიტყვების - „ამერიკა უპირველეს ყოვლისა“ - გამო.

„როიტერსის“ ცნობით, ვაშინგტონის ცენტრში ქალების მარშირებაზე გამოსულთა რაოდენობა 200 000-ზე მეტი იყო და ისინი 1.6 კილომეტრ მანძილზე იყვნენ გადაჭიმულნი.

ჩიკაგოს პოლიციის ცნობით კი, ქალაქ ჩიკაგოში გამართულ მარშირებაში 125 000-ზე მეტი ადამიანი მონაწილეობდა.

როგორც „როიტერსი“ წერს, პროტესტმა აჩვენა, თუ რამდენად გაყოფილია საზოგადოება ქვეყანაში, რომელიც ჯერ კიდევ არ გამოსულა 2016 წლის წინააღმდეგობრივი საარჩევნო კამპანიიდან.

„ჩვენ შეწუხებულები ვართ ყველაფერ იმით, რაც ტრამპს უნდა რომ გააკეთოს“, - განაცხადა 35 წლის ბონი ნორტონმა. მან და მისმა ქმარმა, 36 წლის ჯეფერსონ კოლმა 19 თვის ქალიშვილთან ერთად ვაშინგტონის მარშირებაში მიიღეს მონაწილეობა.

მიუხედავად იმისა, რომ მისი პარტია აკონტროლებს როგორც თეთრ სახლს და კონგრესს, ტრამპი ახლა უზარმაზარი ოპოზიციის წინაშე დგას საზოგადოების დიდ ნაწილთან - იმ დროს, როდესაც ახალი პრეზიდენტისთვის ოფისში შესვლა ჩვეულებისამებრ, თაფლობის თვედ არის ხოლმე მიჩნეული, - წერს „როიტერსი“.

ტრამპის საწინააღმდეგო მარშირებები სოლიდარობის ნიშნად, ლონდონის, სიდნეის, ტოკიოს და ევროპისა და აზიის სხვა ქალაქებშიც გაიმართა.

(ვაშინგტონში, ქალების მარშირებას შეუერთდა აშშ-ის ყოფილი სახელმწიფო მდივანი ჯონ ქერი)

ტრამპმა შაბათს „თვითერზე“ დაწერა: „ჩემთვის დიდი პატივია გემსახუროთ თქვენ, დიდ ამერიკელ ხალხს, როგორც თქვენი 45-ე პრეზიდენტი შეერთებული შტატებისა“, მაგრამ მას პროტესტი არ უხსენებია.