საქართველოს პარლამენტი „ევროპის ახალგაზრდული პარლამენტი – საქართველოს“ მე-11 ეროვნული შესარჩევი კონფერენციის გენერალურ ასამბლეას მასპინძლობს.

პარლამენტის პრესსამსახურის ცნობით, ფორუმის მონაწილეები ახალგაზრდული პარლამენტის კომიტეტების მიერ წარდგენილ საკითხებს განიხილავენ, რომლებიც შეეხება ადამიანის უფლებებს, მართლმსაჯულებას, სამოქალაქო თავისუფლებებს, სოციალურ თემებს, გარემოს დაცვას, სურსათის უვნებლობას, თავდაცვასა და უსაფრთხოებას. აღნიშნულ საკითხებთან დაკავშირებით, დაგეგმილია კომიტეტების მიერ მომზადებული რეზოლუციების მიღება.

„ევროპის ახალგაზრდული პარლამენტი – საქართველოს“ ეროვნულ შესარჩევ კონფერენციაში, რომელიც 19 იანვარს დაიწყო და მუშაობას დღეს დაასრულებს, ევროპის 15-მდე ქვეყნიდან ასზე მეტი ახალგაზრდა მონაწილეობს. ეროვნული შესარჩევი კონფერენცია ყოველწლიურად იმართება და მისი მიზანია ევროპელ ახალგაზრდებში საერთო ევროპული ღირებულებების ამაღლება და მიმდინარე მოვლენებზე საკუთარი პოზიციის ჩამოყალიბების ხელშეწყობა.