შრომის, ჯანმრთელობისა და სოციალური დაცვის მინისტრის, დავით სერგეენკოს თქმით, ფსიქიატრიული დაწესებულებების ბიუჯეტი არ შემცირებულა - მოხდა დაფინანსების მეთოდოლოგიის ცვლილება. 

მინისტრის განცხადებით, დაფინანსების მეთოდოლოგიის ცვლილება  პაციენტების ინტერესების დაცვისკენ არის მიმართული.

სერგეენკოს თქმით, ცვლილებით უკმაყოფილო კლინიკებმა, გარკვეულმა პოლიტიკურმა პარტიებმა და მხარდამჭერების ჯგუფმა მეთოდოლოგიის ცვლილებები წარმოადგინეს, თითქოს ჯანდაცვის სამინისტრო ფსიქიკურ ჯანმრთელობაში დეინსტიტუციონალიზაციის წინააღმდეგია. დავით სერგეენკომ დეინსტიტუციონალიზაციის სამ საკვანძო საკითხზე გაამახვილა ყურადღება:

„ფსიქიკური პრობლემების მქონე პაციენტები (უმეტეს შემთხვევაში ისინი ქრონიკული პაცინეტები არიან) მკურნალობას გადიოდნენ არა დიდი ზომის სპეციალიზირებულ ფსიქიატრიულ კლინიკებში, არამედ მცირე ზომის და ხშირად სხვა სერვისებთან ინტეგრირებულ განყოფილებებში.

შედარებით მსუბუქ შემთხვევაში პაცინეტმა უფრო მერტი დრო უნდა გაატაროს ამბულატორიაში ან თემაზე დაფუძნებულ სერვისებში და არა სტაციონარში. დეინსტიტუციონალიზაცია არის ბევრად უფრო ხარჯეფექტური მოდელი.

რეალურად, რა მოხდა ამ აჟიტირებული მოვლენების უკან? - მწვავე შემთხვევების მართვის დროს, როდესაც ქრონიკული დაავადება მწვავდება და პაციენტს აქვს მწვავე ფსიქოზი, ასეთ შემთხვევაში აბსოლუტურ უმრავლესობაში, ის საჭიროებს სტაციონარში მკურნალობას. სტაციონარში მკურნალობის ანაზღაურების მეთოდი იყო ერთი შემთხვევის მართვა ფიქსირებულად, იმ ერთი თვის განმავლობაში. ჩვენმა მონიტორინგმა უტყუარად დაადგინა, რომ კლინიკები არც თუ ისე იშვიათ შემთხვევაში მწვავე ფსიქოზის მქონე პაციენტს სტაციონარიდან წერდნენ დროზე ადრე, პაციენტი ამავე თვეში განმეორებით ან მეტჯერ შედიოდა იმავე ან სხვა კლინიკაში იმისთვის, რომ ამ კლინიკებს, ამ სიტყვის პირდაპირი მნიშვნელობით, გამოეწერათ ზედმეტი თანხა და ამას აკეთებდნენ პაციენტის უსაფრთხოების ხარჯზე. მწვავე ფსიქოზის დროს პაციენტს განსაკუთრებული მოვლა და მკურნალობა სჭირდება“, - განაცხადა სერგეენკომ.