საქართველო არასოდეს ყოფილა ისე ახლოს ევროპასთან, როგორც დღეს არის, - ეს განცხადება ევროკავშირის ელჩმა საქართველოში, იანოშ ჰერმანმა ევროკავშირი-საქართველოს საინფორმაციო კამპანიის გახსნაზე გააკეთა, რომელსაც საქართველოს პრემიერ მინისტრი დაესწრო.

ევროკავშირი-საქართველოს საინფორმაციო კამპანია ასოცირების ხელშეკრულების განხორციელების მხარდაჭერის პროექტის ფარგლებში განხორციელდება.

მთავრობის ადმინისტრაციის ცნობით, გიორგი კვირიკაშვილმა ღონისძიების მონაწილეებს სიტყვით მიმართა და აღნიშნა, რომ იწყება ძალიან მნიშვნელოვანი კამპანია, რომელიც საქართველოსა და ქართველი ხალხის ევროპასთან დაახლოების მიზანს მოემსახურება.

„დღეს ჩვენს ქვეყანას ეძლევა შანსი, თავისი უძველესი ისტორიით, კულტურით, უმდიდრესი ტრადიციებით, დაუახლოვდეს თავისუფალ და დემოკრატიულ ევროპულ ოჯახს, საკუთარი წვლილი შეიტანოს მრავალფეროვან, მდიდარ ევროპულ კულტურაში, მშვიდობის განმტკიცებისა და უსაფრთხოების უზრუნველყოფის უმნიშვნელოვანეს საქმეში. ჩვენ ძალიან მალე ველოდებით ოფიციალურ თანხმობას, უვიზო მიმოსვლასთან დაკავშირებით, რაც ევროპასთან დაახლოებისა და ევროპაში ინტეგრირების პროცესის კიდევ ერთი ხელშესახები შედეგი იქნება“, - განაცხადა პრემიერ მინისტრმა.

ღონისძიების მონაწილეებს ასევე სიტყვით მიმართეს ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ვიქტორ დოლიძემ, საქართველოში ევროკავშირის ელჩმა იანოშ ჰერმანმა, საქართველოს საგარეო საქმეთა მინისტრმა მიხეილ ჯანელიძემ, საქართველოს იუსტიციის მინისტრმა თეა წულუკიანმა, ნატოსა და ევროკავშირის შესახებ საინფორმაციო ცენტრის დირექტორმა ქეთევან ჩაჩავამ.