შრომის, ჯანმრთელობისა და სოციალური დაცვის მინისტრის დავით სერგეენკოს განცხადებით, 180 ათასი ლარის ღირებულების ნივთები მთლიანად მთავრობის ადმინისტრაციისთვისაა განკუთვნილი და შედარებისთვის, 3 წლის წინათ მხოლოდ პრემიერის რეზიდენციისთვის, დაახლოებით იმავე რაოდენობის ნივთების შეძენა მილიონ ნახევარი დაჯდა.

სერგეენკომ ეს განცხადება, მთავრობის სხდომის დაწყებამდე, ჟურნალისტებთან საუბრისას განაცხადა და დაამატა, რომ მთავრობის ადმინისტრაციის რემონტი რამდენიმე თვის წინათ დაიწყო და ეს ავეჯიც რამდენიმე თვის წინათ შეუკვეთეს.

„180 ათასი ლარის ღირებულების ნივთები მთლიანად მთავრობის ადმინისტრაციისთვისაა განკუთვნილი. შედარებისთვის, მხოლოდ პრემიერის რეზიდენციისთვის სამი წლის წინ, დაახლოებით იგივე რაოდენობის ნივთები მილიონნახევარი დაჯდა," განაცხადა სერგეენკომ.

იტალიური ავეჯის შეძენის საკითხი გუშინდელ პრეს-კონფერენციაზე „ნაციონალური მოძრაობის“ ერთ-ერთმა ლიდერმა ირმა ნადირაშვილმა გაახმოვანა. მისი თქმით, პრემიერ-მინისტრმა ირაკლი ღარიბაშვილმა დეკემბრის თვეში, იტალიაში 181 401 ლარის რბილი ავეჯი შეიძინა. ამ თემას მთავრობის ადმინისტრაციის უფროსი მაია ცქიტიშვილი გუშინვე გამოეხმაურა და განაცხადა, რომ რბილი ავეჯის შეძენის შესახებ ნადირაშვილის მიერ გავრცელებული ინფორმაცია ზუსტი არ არის. კერძოდ კი, ნადირაშვილმა არასწორი ციფრები დაასახელა. მისივე თქმით, ავეჯი პრემიერ-მინისტრ ირაკლი ღარიბაშვილისთვის არ არის შეძენილი, ის მაღალი რანგის სტუმრების მისაღებად არის საჭირო.