თბილისში ე.წ. ბავშვთა სამყაროს მიმდებარე ტერიტორიაზე დედაქალაქის საკრებულოს თავმჯდომარე გიორგი ალიბეგაშვილი მივიდა.

მან ჟურნალისტებთან საუბრისას გამოთქვა ვარაუდი, რომ შენობას დანგრევა დასჭირდება.

„ძალიან სამწუხარო ფაქტი მოხდა - ბავშვთა სამყაროს ცეცხლი გაუჩნდა. როგორც მითხრეს 03:11 წუთზე მოხდა, სამწუხაროდ, გვიან მოხდა ამ ამბის შეტყობინება იმიტომ, რომ უცაბედად გაირკვა, რომ მთლიანად იყო მოდებული. ახლა ეს შენობა არის მთლიანად დეფორმირებული. მეხანძრეები ყველა ღონეს ხმარობენ, რომ ცეცხლის ლიკვიდაცია ბოლომდე შეძლონ. შიგნით შესვლა არ ხერხდება იმიტომ, რომ სინკარები არის დეფორმირებული და ნებისმიერ წუთს შეიძლება ჩამოვრადეს და ტრაგედია დატრიალდეს. როგორც ჩანს, ამას სხვანაირი დამუშავება დასჭირდება. როგორც ჩანს, შენობას დანგრევა დასჭირდება. იმედია, რომ ისინი ჩვენი მხრიდან, მუნიციპალიტეტისა და საკრებულოს მხრიდან, თანადგომას იგრძნობენ", - განაცხადა გიორგი ალიბეგაშვილმა.

ადგილზე მისული იყო დედაქალაქის მერი დავით ნარმანია, რომელიც მომხდარზე პასუხისმგებლობას დაზარალებული მოვაჭრეების წინაშე ბაზრის ადმინისტრაციას აკისრებს. 

თავად ე.წ. ბავშვთა სამყაროს ადმინისტრაციის წარმომადგენლები კი აცხადებენ, რომ შენობის ტერიტორიაზე უსაფრთხოების ნორმები დაცული იყო.

ადმინისტრაცია განმარტავს, რომ ღამის საათებში დაცვის თანამშორმლები სისტემატურად ამოწმებენ ტერიტორიას, იკეტება ყველა კარი.

ჟურნალისტებთან საუბრისას ადმინისტრაციის წარმომადგენლებმა განმარტეს, რომ ადამიანებისთვის, რომლებიც ამ სავაჭრო ცენტრში მუშაობდნენ და ხანძრის შედეგად დაზარალდნენ, კომპენსაციის გადახდას ადმინისტრაცია ვერ შეძლებს.

ამ დრომდე უცნობია ხანძრის გამომწვევი მიზეზები. შინაგან საქმეთა სამინისტრომ მომხდართან დაკავშირებით გამოძიება 187-ე მუხლით დაიწყო, რაც სხვისი ნივთის დაზიანებას ან განადგურებას გულისხმობს.