სამხედრო სამეცნიერო-ტექნიკური ცენტრ „დელტა“ -ს ეუთოს ექსპერტები ეწვივნენ. ვიზიტი „დელტაში“ მიმდინარე პროექტის „საავიაციო რაკეტებისა და ბომბების გაუვნებელყოფა, გადამუშავება და განადგურება, ფეთქებადი ნივთიერების გამოდნობა საარტილერიო ჭურვებიდან“ ფარგლებში განხორციელდა.

თავდაცვის სამინისტროს ცნობით, პროექტის მიზნებს საქართველოს სამხედრო ბაზებში რუსეთის შეიარაღებული ძალების მიერ დატოვებული ვადაგასული და ჩამოწერილი სხვადასხვა ტიპის საბრძოლო მასალის არასანქცირებული გამოყენების, სხვა ქვეყანაში ან ტერორისტების ხელში მოხვედრის ალბათობის ნულამდე დაყვანა წარმოადგენს.

უწყების ინფორმაციით, პროექტი ასევე ზენორმატიული საბრძოლო მასალებისაგან გამოწვეული რისკების შემცირებას, ბაზების მიმდებარე ტერიტორიაზე მცხოვრები მოსახლეობისა და გარემოს მოსალოდნელი ხიფათისაგან დაცვას ითვალისწინებს.

სამინისტროს განმარტებით, ეუთო-ს ექსპერტების ვიზიტის შემდეგ შემუშავდება შეფასების ანგარიში, რომელიც შეთავაზებული განადგურების და ტრანსპორტირების მეთოდოლოგიად იქნება გამოსაყენებელი და ასევე სამომავლო მოქმედებებისათვის შესაბამის რეკომენდაციებს უზრუნველყოფს.

ექსპერტები, ვიზიტის ფარგლებში, საარტილერიო ჭურვებისა და გასროლების განადგურებისა და ტრანსპორტირების ინსტრუქციებს გადახედავენ, რომლებიც სსსტც „დელტა“-ს მიერ მომზადდა.

საქართველოში ვიზიტით ექსპერტებს საშუალება მიეცემათ გადახედონ დედოფლისწყაროში უტილიზაციის საწარმოს და შეთავაზებული მეთოდოლოგიები “დელტას” ტექნოლოგებთან ერთად განიხილონ.

უწყების ინფორმაციითვე, პროექტი საქართველოს თავდაცვის სამინისტროს თანხმობითა და მისი უშუალო ზედამხედველობის ქვეშ ხორციელდება.