ნინოწმინდის მუნიციპალიტეტში თოვლის საფარმა ნახევარ მეტრს გადააჭარბა, თუმცა საავტომობილო გზები, როგორც ცენტრალური, ისე სოფლებთან დამაკავშირებელი გზები მთლიანად გაწმენდილია.

ნინოწმინდის მუნიციპალიტეტის გამგებელმა გაგიკ კარსლიანმა Guardian.ge-ს განუცხადა, რომ ახალციხე-ახალქალაქი-ნინოწმინდის ცენტრალური საავტომობილო გზის გაწმენდით სამუშაოებს საქართველოს რეგიონული განვითარებისა და ინფრასტრუქტურის სამინისტროს საგზაო დეპარტამენტი, ხოლო მუნიციპალიტეტის შიდა გზების თოვლის საფარისგან გაწმენდას ადგილობრივი ხელისუფლება თავისი სპეცტექნიკით ახორციელებს.

გაგიკ კარსლიანის განცხადებით, ოპერატიულად გაიწმინდა ნინოწმინდა-ჰეშტიას 12კმ-იანი საგზაო მონაკვეთი, ასევე ნინოწმინდა-დიდი გონდურას დამაკავშირებელი 8 კმ-იანი საავტომობილო გზა, გონდურა-ღულალისის 5 კმ-იანი მონაკვეთი, ღულალისის 3კმ-იანი ცენტრალური გზა;

ნინოწმინდა-სათხა-სპასოვკა (10კმ); ნინოწმინდა- დიდი ხანჩალი-პატარა ხანჩალი (8კმ); დიდი ხანჩალი-კათნატუ (4კმ); ნინოწმინდა-ჟდანოვი-სამება (4კმ); ნინოწმინდა-ჰეშტია-უჩმანა (4კმ); ჰეშტია-თორია (5კმ); ნინოწმინდა-ორჯალარი (5კმ) და ასევე სხვა - ჯამში 70 კმ-ზე მეტი სიგრძის საავტომობილო გზები.

გაგიკ კარსლიანის თქმით, ძლიერი ქარის პირობებში მუნიციპალიტეტში განსაკუთრებული სირთულეები იქმნება, რადგან გაწმენდილი გზები რამდენიმე საათში შესაძლოა ნამქერმა თოვლის დიდი მასით დაფაროს და ტექნიკას საავტომობილო გზების გაწმენდა ხელმეორედ მოუწიოს.

თუმცა ამის მიუხედავად, ნინოწმინდის გამგებლის განცხადებით, მუნიციპალიტეტის ყველა დასახლებული პუნქტი ადგილობრივი ხელისუფლების განსაკუთრებული ზრუნვის საგანია და ზამთრის რთულ კლიმატურ პირობებში არც ერთი სოფლის მცხოვრებლებს ქალაქთან დაკავშირების პრობლემები არ გააჩნიათ.