პარლამენტის იურიდიულ საკითხთა კომიტეტში საკონსტიტუციო სასამართლოს მოსამართლეობის კანდიდატის, მანანა კობახიძის მოსმენა მიმდინარეობს.

მან პარლამენტის წევრებს სამომავლო გეგმები წარუდგინა.

კობახიძე, რომელიც აღნიშნულ პოსტზე ფრაქცია „ქართულმა ოცნებამ" წარადგინა, აცხადებს, რომ თუ მისი კანდიდატურა მხარდაჭერილი იქნება, მხოლოდ და მხოლოდ კონსტიტუციურ მართლმსაჯულებას ემსახურება.

„დიახ, ფრაქცია „ქართული ოცნების“ წევრი ვარ დღესაც, მაგრამ თუ ჩემი კანდიდატურა მხარდაჭერილი იქნება, ყოველგვარი პოლიტიკური ბმა პარლამენტთან, ამ ფრაქციასთან, პარტიასთან არის გამორიცხული და მე ვემსახურები მხოლოდ და მხოლოდ კონსტიტუციურ მართლმსაჯულებას.... თუ მოსამართლეს ავუკრძალავთ იმას, რომ მას რაიმე ტიპის პოლიტიკური სიმპათია ჰქონდეს ან შეხედულებები გააჩნდეს გარკვეულ საკითხებთან, ასეთ ადამიანს უბრალოდ ვერ მოვძებნით. მაშინ შეიძლება, მოსამართლეებს არჩევნებში მონაწილეობის უფლებაც ავუკრძალოთ, იმიტომ, რომ ის მიდის და რომელიღაც პოლიტიკურ პარტიას აძლევს ხმას, აქვს სიმპათია, მაგრამ ეს არ ნიშნავს, რომ ის უნდა ხელმძღვანელობდეს ამ სიმპათიით - ის უნდა დადგეს ყოველგვარ პოლიტიკურ შეხედულებებზე მაღლა“, - განაცხადა მანანა კობახიძემ.