„ერთიანი ნაციონალური მოძრაობის" ოფისში ნატა ნაზღაიძის ოჯახის მიერ სახელმწიფო ბიუჯეტიდან მილიონი ლარის მიღების თაობაზე, საგანგებო ბრიფინგი გაიმართა.

ენმ-ი აღნიშნულ საკითხთან დაკავშირებით რამდენიმე მოთხოვნას აყენებს, მათ შორისაა: ნატა ნაზღაიძის უფლებამოსილების შეწყვეტა; ნაზღაიძის მიერ „რუსთავი 2"-ის საქმეზე გამოტანილი განაჩენის გაუქმება, თბილის მერის იმპიჩმენტი და ა.შ.

„მინდა გამოვეხმაურო კორუფციული გარიგების უპრეცედენტო ფაქტს - მოსამართლე ნაზღაიძის ოჯახსა და თბილისის მერიას შორის. როდესაც თბილისის მერია მთავრობის კუთვნილი ბიუჯეტიდან ხალხის კუთვნილ ფულს აძლევს პირდაპირ კორუფციული გარიგებით მოსამართლე ნაზღაიძეს მხოლოდ და მხოლოდ იმიტომ რომ მან გამოიტანოს უკანონო გადაწყვეტილება „რუსთავი 2"-ის საქმეზე. დიახ, ნაზღაიძე ასრულებს პოლიტიკურ დაკვეთას, რასაკვირველია, დიდი სიხარულით კორუფციულ გარიგებაში მონაწილეობს და გამოაქვს უკანონო გადაწყვეტილება „რუსთავი 2"-ის საქმეზე. „ერთიანი ნაციონალური მოძრაობა" დიახ, ჩვენ არ ვაპირებთ შევეგუოთ სიტყვისა და გამოხატვის თავისუფლების შეზღუდვას; არ ვაპირებთ შევეგუოთ სასამართლო სისტემის, როგორც ძალიან მნიშვნელოვანი სახელმწიფო ინსტიტუტის ფეხქვეშ გათელვას; არ ვაპირებთ შევეგუოთ ივანიშვილის დაკვეთების მიხედვით, სასამართლოზე, თავისუფალ მედიაზე ზეწოლას და ვაყენებთ ძალიან კონკრეტულ და საზოგადოებისთვის ძალიან მნიშვნელოვან მოთხოვნებს. კერძოდ მოვითხოვთ: საერთო სასამართლოების კანონის შესაბამისად, იუსტიციის საბჭოსგან შეუწყდეს უფლებამოსილება კორუმპირებულ მოსამართლე ნაზღაიძეს, რომელმაც გამოიტანა უკანონო გადაწყვეტილება „რუსთავი 2"-ის საქმეზე. მოვუწოდებთ უზენაესი სასამართლოს დიდი პალატის მოსამართლეებს, გააუქმონ მოსამართლე ნაზღაიძის მიერ გამოტანილი განაჩენი „რუსთავი 2"-ის საქმეზე. ასევე მოვითხოვთ და ხაზს ვუსვამთ, აუცილებლად განხორციელდება ამ ჩვენი მოთხოვნის მონიტორინგი, რომ გაუქმდეს კორუმპირებული გარიგება, ხელშეკრულება მოსამართლე ნაზღაიძესა და თბილისის მერიას შორის. კერძოდ, დაბრუნდეს ხალხის კუთვნილი ფული ბიუჯეტში და ეს ხალხის კუთვნილი ფული გადანაწილდეს მართლაც იმ გაჭირვებულ ადამიანებზე, რომლებსაც ეს მილიონი ლარი, ხაზს ვუსვამ, მილიონი ლარი ძალიან სჭირდებათ. კიდევ ერთი მოთხოვნა - აუცილებლად ამ უპრეცედენტო გარიგების შემდეგ, უნდა მოხდეს თბილისის მერის იმპიჩმენტი. ვინაიდან თბილისის მერი და მერიის სამსახურები პირდაპირ არიან უპრეცედენტო კორუფციულ გარიგებაში ეჭვმიტანილნი. და ყველაზე მნიშვნელოვანი - დაისაჯოს ყველა ის უფლებამოსილი პირი, რომლებმაც ჩაიდინეს დანაშაული და რომლებმაც ხალხის კუთვნილ ბიუჯეტზე იხეირეს", - განაცხადა ბრიფინგზე ხატია დეკანოიძემ.