საქართველოს თავდაცვის მინისტრის პირველმა მოადგილემ, ლელა ჩიქოვანმა აშშ-ის მრჩეველთა „თავდაცვის ინსტიტუციური აღმშენებლობის ჯგუფსა“ და „საქართველოს თავდაცვის მზადყოფნის პროგრამის ჯგუფს“ თავდაცვის სამინისტროში უმასპინძლა.

უწყების ცნობით, ლელა ჩიქოვანმა ამერიკულ მხარესთან ოპტიმიზაციის შედეგად დაზოგილი თანხების პრიორიტეტების მიხედვით გადანაწილების შესახებ ისაუბრა და აღნიშნა, რომ უწყება კვლავაც დიდ ძალისხმევას მიმართავს რეფორმების პროცესში მიღწეული წარმატების შესანარჩუნებლად და გასაგრძელებლად.

„თავდაცვის ინსტიტუციური აღმშენებლობის ჯგუფის“ წარმომადგენლებმა თავის მხრივ მზადყოფნა გამოთქვეს თანამშრომლობისთვის და მხარდაჭერა გამოუცხადეს უწყებაში მიმდინარე პროცესებს.

შეხვედრისას თავდაცვის მინისტრის პირველმა მოადგილემ ამერიკის შეერთებულ შტატებსა და საქართველოს შორის თანამშრომლობის მნიშვნელობაზე ისაუბრა და ამ მხრივ ხაზგასმით აღნიშნა ამერიკის მხარდაჭერა თავდაცვის სფეროში.

ამერიკის შეერთებული შტატების მრჩეველთა ჯგუფის წარმომადგენლები თავდაცვის სამინისტროში შეხვედრებს განაგრძობენ. კვირის განმავლობაში დაგეგმილია სამუშაო შეხვედრები გენერალური შტაბის უფროსის მოადგილესთან, თავდაცვის სამინისტროსა და გენერალური შტაბის დაქვემდებარებული ქვედანაყოფების წარმომადგენლებთან.

ორმხრივი თანამშრომლობის ფარგლებში ამერიკელი მრჩევლებისგან ძალთა მართვის, საბრძოლო მზადყოფნის და რესურსების მართვის სფეროში არსებული მდგომარეობის, საშუალო და გრძელვადიანი გეგმების შეფასება და რეკომენდაციების მიღება იგეგმება.