„ერთიანი ნაციონალური მოძრაობის" ინფორმაციით, 10-დან 15 თებერვლამდე პერიოდში, უზენაესი სასამართლო „რუსთავი 2"-ის საქმეზე გადაწყვეტილებას გამოაცხადებს.

ამის შესახებ ცოტა ხნის წინათ გამართულ პრესკონფერენციაზე პარტიის პოლიტიკური საბჭოს თავმჯდომარემ, ნიკა მელიამ ისაუბრა.

„ჩვენთვის ცნობილი გახდა, რომ 10 თებერვლიდან 15 თებერვლის ჩათვლით აი, ამ დღეებში, უზენაესი სასამართლო ხელისუფლების ზეწოლით აპირებს უკანონო გადაწყვეტილების მიღებას „რუსთავი 2"-ის საქმესთან დაკავშირებით და თქვენ უკვე უკანასკნელი დღეების განმავლობაში იხილეთ არაერთი დამადასტურებელი ფაქტი, თუ როგორ არის ხელისუფლება ჩართული მთელი თავისი ბიუროკრატიული რესურსით, რომ „რუსთავი 2"-ის წინააღმდეგ გამოიტანოს სასამართლომ გამამტყუნებელი განაჩენი. საზოგადოებისთვის უკვე ცნობილია, რომ კონკრეტულ მოსამართლესთან, კონკრეტული კორუფციის დამადასტურებელი დოკუმენტი არსებობს, რაც უკვე ძალიან ლეგიტიმურ საფრთხეს აჩენს, რომ ხელისუფლება რჩება უკანონო გადაწყეტილების შემკვეთად, სადაც ჩართულია მთელი ბიუროკრატიული რესურსი - დაწყებული ბიძინა ივანიშვილით და გაგრძელებული მისი პირადი ყოფილი დაცვის უფროსის უწყებით, ბატონი გომელაურის უწყების - სუს-ი მაქვს მხედველობაში. აქედან გამომდინარე, „ნაციონალური მოძრაობა" 10 თებერვალს 13:30 საათზე, რუსთაველის მეტროსთან იკრიბება, რათა გააპროტესტოს მსგავსი უხეში ჩარევა სასამართლო გადაწყვეტილების მიღების პროცესში.... „ნაციონალური მოძრაობის" პრობლემა არ არის მხოლოდ „რუსთავი 2", თავისუფალი მედია, ეს არის ყველა უკეთესი ხვალინდელი დღის მსურველი ადამიანის წუხილი, რომ პარასკევს, 13:30 საათზე გამოცხადდეს რუსთაველის მეტროსთან და ჩვენ მსვლელობით დავიძვრებით უზენაესი სასამართლოსკენ, სადაც ჩავატარებთ აქციას, რომელიც მოემსახურება ერთი მხრივ, იმ სისაძაგლეს, რომელსაც ადგილი აქვს ბიძინა ივანიშვილის მხრიდან და მეორე მხრივ, სოლიდარობა იმ პატიოსანი და მიუკერძოებელი მოსამართლეების მიმართ, რომლებიც ჯერ კიდევ, მადლობა ღმერთს, შემორჩენილი არიან უზენაეს სასამართლოში", - განაცხადა მელიამ.