პარლამენტის იურიდიულ საკითხთა კომიტეტის თავმჯდომარე საზოგადოებრივ მაუწყებელში მიმდინარე მოვლენებს ეხმაურება და აცხადებს, რომ ამ მდგომარეობაში ტელევიზიის დატოვება „ყველას და ყველაფრის" გაწირვა და ამავე დროს, „წყალში გადაყრილი მილიონები" იქნებოდა.    

მისი თქმით, როდესაც მოქალაქეები იხდიან ფულს იმისთვის, რომ მაუწყებელი საზოგადოებას ემსახურებოდეს, „ეს ფული არ უნდა მიდიოდეს ვიღაცების ჯიბეში".    

„თქვენ იცით, ალბათ, რომ სამუშაო ჯგუფი შევქმენით ჩვენ პარლამენტში - ეს არის საკმაოდ ფართო წარმომადგენლობითი ჯფუფი, რომელიც „მაუწყებლის შესახებ" კანონზე მუშაობს და მასში ჩართულები არიან ექსპერტები, დეპუტატები, არასამთავრობო ორგანიზაციამ ითხოვა - ჩავრთეთ, ოპოზიცია ჩავრთეთ. მზად ვარ, რომ ამის გარდა, ამ საკანონმდებლო ცვლილებების გარდა, იმ საკითხებზეც მოვისმინო ყველა მხარის პოზიცია, რომელიც ფიქრობს, რომ მისი უფლებები შელახულია. ეს არის ძალიან მნიშვნელოვანი საკითხი. მაუწყებელი ჩვენთვის არის ძალიან ღირებული რამ. ძალიან დიდი თანხა ეხარჯება ბიუჯეტს - 410 მლნ არ არის ეს უმნიშვნელო თანხა. როდესაც ყოველწლიურად 45 მლნ უნდა გაიღონ ჩვენმა მოქალაქეებმა იმისთვის, რომ მაუწყებელი ემსახურებოდეს საზოგადოებას, ეს ფული არ უნდა მიდიოდეს ვიღაცების ჯიბეში; არ უნდა ხმარდებოდეს რაღაც კლანურ დაჯგუფებებს,  ეს უნდა ხმარდებოდეს ტელევიზიის გაძლიერებას, ჟურნალისტების ხელფასს, მათ სოციალურ დაცვას, ტელევიზიის სიძლიერეს. მე მზად ვარ, პირადად, როგორც ერთი ადამიანი, ვიყო აქტიურად ჩართული ამ პროცესში და დავიცვა ამ ტელევიზიის და ჟურნალისტების უფლებები. ამასვე გააკეთებს ახლა ის გუნდი, რომელიც მისულია მაუწყებელში და სხვა განზრახვა არ აქვს, სხვათა შორის, ახალ გენერალურ დირექტორს. მას უნდა რომ ტელევიზია გახდეს ძალიან ძლიერი. აი, ამ კატასტროფული სურათით, რაც ჩვენ ვნახეთ ყველამ ხომ, რაც ხდება ტელევიზიაში, რამდენად ფეთქებადსაშიში ვითარებაა იქ - ამ ვითარებში დატოვება ტელევიზიის - ეს არის გაწირვა ყველასი და ყველაფრის და ამავე დროს, ეს არის წყალში გადაყრილი მილიონები“ - განაცხადა ეკა ბესელიამ „რუსთავი 2"-თან საუბრისას.