მარნეულის მოსახლეობასთან შეხვედრაზე, ქვემო ქართლის გუბერნატორს ქვეყნის პრეზიდენტისა და პრემიერის გვარები აერია და აზერბაიჯანელ მოსახლეობას ისინი ირაკლი მარგველაშვილად და გიორგი ღარიბაშვილად წარუდგინა, რასაც პრეზიდენტის მხრიდან რეპლიკა მოჰყვა.


„ყველანი - ირაკლი მარგველაშვილიც, გიორგი ღარიბაშვილიც, თქვენს სამსახურში ვართ, - ასე მიმართა საქართველოს პრეზიდენტმა გიორგი მარგველაშვილმა მარნეულის მოსახლეობას, რომელსაც პრემიერ-მინისტრ ირაკლი ღარიბაშვილთან ერთად ნოვრუზ ბაირამის დღესასწაული
მიულოცა.


ქვეყნის პირველმა პირმა აზერბაიჯანელ მოსახლეობას თანადგომა გამოუცხადა და პირობა დადო, რომ მათ გვერდით არა მხოლოდ დღეს, მთელი წლის განმავლობაში იქნება.


"მინდა ხაზი გავუსვა იმას, რომ ყველანი, ირაკლი მარგველაშვილიც, გიორგი ღარიბაშვილიც - ყველანი თქვენ სამსახურში ვართ, იმიტომ რომ გემსახუროთ და ერთად ავაშენოთ უფრო ძლიერი, უფრო გამართული, უფრო ბედნიერი საქართველო. თქვენ ძალიან ბევრს აკეთებთ, ძალიან ბევრს შრომობთ, ხართ ძალიან ნიჭიერები და შრომისუნარიანები. იცოდეთ, რომ ამას ყველა ხედავს და ცდილობს, რომ რაც შეიძლება მეტად შეუწყოს ხელი თქვენს კარგად ყოფნას. დღეს არის დღე ახლის დაწყების, ახალი ენერგიის, გაზაფხულის. სიხარულის და იცოდეთ, რომ ამ დღეს და მთელი წლის განმავლობაშიც ვარ თქვენთან ერთად. თქვენთან ერთად ვიბრძვი ბედნიერი საქართველოსთვის. გილოცავთ ბაირამს და ბედნიერი იყავით", - მიმართა მარგველაშვილმა მარნეულში შეკრებილ ადგილობრივ მოსახლეობას.