საზოგადოებრივი მოძრაობის „ახალი ერთობა საქართველოსთვის" ინიციატივას თავისუფალი სიტყვის დამცველი საკოორდინაციო საბჭოს შექმნასთან დაკავშირებით, „ერთიანი ნაციონალური მოძრაობა" უერთდება.

როგორც პარტიის წევრი ნუგზარ წიკლაური აცხადებს, „რუსთავი 2"-ის საქმესთან დაკავშირებით მნიშვნელოვანი და აუცილებელია პოლიტიკური პარტიების მხრიდან შეთანხმებული მოქმედება და ამ საკითხზე ერთობლივი კონსულტაციების გამართვა.

“ერთიანი ნაციონალური მოძრაობა" მიესალმება ამ განცხადების სულისკვეთებას და დღესვე სთავაზობს ყველა დაინტერესებულ პარტიას, ვისთვისაც მნიშვნელოვანია საქართველოში თავისუფალი სიტყვის ბედი და „რუსთავი 2"-ის გადარჩენა ბიძინა ივანიშვილისგან, დავიწყოთ კონსულტაციები ამ მიმართულებით. ჩვენ მზად ვართ მთელი ეს პროცესი იყოს კოორდინირებული და ყველა ერთად, ქართულ საზოგადოებასთან ერთად, შევძლოთ დავიცვათ თავისუფალი სიტყვა საქართველოში,“ - განაცხადა ნუგზარ წიკლაურმა.

საზოგადოებრივი მოძრაობა „ახალი ერთობა საქართველოსთვის" გამოდის ინიციატივით, რომ შეიქმნას საკოორდინაციო საბჭო, რომლის მიზანიც თავისუფალი სიტყვის დაცვა იქნება.

როგორც მოძრაობის დამფუძნებელი მამუკა გამყრელიძე აცხადებს, „იმ ვითარებაში, როდესაც სამართლებრივი ბრძოლის ყველა ბერკეტი ქრება, კანონმდებლობის დაცვას საზოგადოება იწყებს".

„ხელისუფლებამ აირჩია არასწორი გზა და გამოუცხადა ღია ომი სიტყვის თავისუფლებას. მიმდინარეობს სხვადასხვა სატელევიზიო მაუწყებლების დამორჩილების მეთოდური პროცესები, რის დასკვნით ფაზას ჩვენ ვხედავთ „საზოგადოებრივი მაუწყებლის" კასტრაციის სახით. რაც შეეხება დამოუკიდებელ ტეელკომპანია „რუსთავი 2"-ს, მის წინააღმდეგ ხელისუფლებამ ყველა შესაძლებელი მეთოდის გამოყენება დაიწყო, მათ შორის, ყველაზე მიუღებელი ამ პროცესში ხელისუფლების მიერ მართული სასამართლოსა და მოსამართლეების ჩართვაა. იმ ვითარებაში, როდესაც ხელისუფლების მეცადინეობით სამართლებრივი ბრძოლის ყველა ბერკეტი ქრება, კანონმდებლობის დაცვას იწყებს საზოგადოება. გარდა ამისა, ვითვალისწინებთ რა რეალობას, რომ ეს ბრძოლა არ იქნება მარტივი და მხოლოდ ერთი პოლიტიკური აქცია ვერ იქნება შედეგის მომტანი, გამოვდივართ ინიციატივით - შეიქმნას საკოორდინაციო საბჭო, პოლიტიკური და საზოგადოებრივი ორგანიზაციების მონაწილეობით, რომლის ერთადერთ მიზანს წარმოადგენს თავისუფალი სიტყვის დაცვა", - განაცხადა მამუკა გამყრელიძემ.