საზოგადოებრივი მოძრაობის „ახალი ერთობა საქართველოსთვის" ინიციატივას თავისუფალი სიტყვის დამცველი საკოორდინაციო საბჭოს შექმნასთან დაკავშირებით, რამდენიმე პოლიტიკური პარტია და საზოგადოებრივი ორგანიზაცია შეუერთდა.

პოლიტიკურმა პარტიებმა საკოორდინაციო საბჭო უკვე შექმნეს და პირველი შეხვედრაც გამართეს.

საბჭოს სხდომის დასრულების შემდეგ, ჟურნალსტებთან საუბრისას, „ერთიანი ნაციონალური მოძრაობის“ წევრმა, ზაზა ბიბილაშვილმა განაცხადა, რომ აღნიშნული საბჭო ხვალ ენმ-ის მიერ დაანონსებულ აქციაშიც მიიღებს მონაწილეობას.

„დღეს შეიკრიბა რვა პოლიტიკური პარტია და რამდენიმე საზოგადოებრივი ორგანიზაცია. ჩვენი მიზანი პირველ რიგში არის დავიცვათ „რუსთავი 2“ და ასევე სოლიდარობა გამოვუცხადოთ „საზოგადოებრივ მაუწყებელს“ და მის ჟურნალისტებს. საკოორდინაციო საბჭოს სრული შემადგენლობით უერთდება ხვალინდელ აქციას. ჩვენ არ ვაპირებთ დიდი ხანი ვიყოთ თავდაცვით რეჟიმში", - განაცხაადა ზაზა ბიბილაშვილმა.

საკოორდინაციო საბჭოს შემადგენლობაში არიან: „ახალი ერთობა საქართველოსთვის", „სახელმწიფო ხალხისთვის", „ეროვნულ-დემოკრატიული პარტია", „ევროპელი დემოკრატები", „ალიანსი საქართველოსთვის", „ნაციონალური მოძრაობა", „რეფორმატორები", „ქრისტიან-კონსერვატიული პარტია".

საკოორდინაციო საბჭოს შექმნის ინიციატივით დღეს საზოგადოებრივი მოძრაობა „ახალი ერთობა საქართველოსთვის" გამოვიდა. პირველი აღნიშნულ ინიციატივას  „ერთიანი ნაციონალური მოძრაობა" შეუერთდა.