სახელმწიფო დაცვის სპეციალური სამსახურის უფროსი ანზორ ჩუბინიძე, რომელიც ამჟამად გერმანიაში, ბერლინში იმყოფება, აცხადებს, რომ საქართველოს პატრიარქის უსაფრთხოება დაცულია.

როგორც მან ჟურნალისტებთან საუბრისას აღნიშნა, პატრიარქის უსაფრთხოების გაძლიერების საჭიროება დღის წესრიგში არ იდგა, თუმცა, მისი თქმით, სდსს-მა უსაფრთხოების თვალსაზრისით არსებული მდგომარეობის გადამოწმება საჭიროდ ჩათვალა.

„მე გერმანიაში ჩამოსვლას მაინც ვგეგმავდი პრემიერის მოსალოდნელ ვიზიტთან დაკავშირებით. ჩემი ჩამოსვლა შემთხვევითი არ იყო და გადავწყვიტე, აქაც მოვსულიყავი და ჩემი თვალით მენახა მდგომარეობა”, - განაცხადა ანზორ ჩუბინიძემ.

ჩუბინიძემ ჟურნალისტებთან საუბრისას საპატრიარქოს ქონების მართვის სამსახურის ხელმძღვანელის მამა გიორგი მამალაძის დაკავების ფაქტი დაადასტურა. მანვე კომენტარი პატრიარქის უსაფრთხოების სამსახურის უფროსის, იოსებ ოხანაშვილის დაკითხვაზეც გააკეთა. მისი თქმით, ოხანაშვილი გერმანიიდან თბილისში დაბრუნდა და პროკურატურაში დაიკითხა. 

„სჯობს, სოსომ გააკეთოს თვითონ კომენტარი, მაგრამ ვფიქრობ, რომ ძალიან კარგად მოიქცა, როდესაც ჩავიდა საქართველოში და დაეხმარა გამოძიებაში შესაბამის ორგანოებს. ვფიქრობ, ჩვენმა ჩამოსვლამ ხელი შეუწყო ამ სამსახურის სწორად ფუნქციონირებას აქ. სოსო განაგრძობს ჩვეულ რეჟიმში პატრიარქის უსაფრთხოებაზე ზრუნვას. მასთან ამ ეტაპზე არანაირი კითხვის ნიშანი არ არის”, - განაცხადა ანზორ ჩუბინიძემ.

„რუსთავი 2"-ის ინფორმაციით, მამა გიორგი მამალაძე 10 თებერვალს აეროპორტში დააკავეს. იგი გერმანიაში პატრიარქთან მიემგზავრებოდა. ჯერჯერობით უცნობია, კონკრეტულად რას უკავშირდება გიორგი მამალაძის დაკავება და იოსებ ოხანაშვილის დაკითხვა. საქართველოს ოფიციალურ უწყებებს განცხადებები ამ დრომდე არ გაუეკთებიათ.

საქართველოს კათოლიკოს პატრიარქი, უწმინდესი და უნეტარესი ილია მეორე გერმანიაში რამდენიმე დღის წინათ სამკურნალოდ წავიდა. უწმინდესს დღეს, თბილისის დროით, 11:00 საათზე ოპერაცია ჩაუტარდება.