საქართველოს ხელისუფლება ჩაბმულია შეთქმულებაში ქართული ეკლესიის წინააღმდეგ, როგორც ჩანს მათი რეაქციებიდან, - აღნიშნული განცხადება „რუსთავი 2"-ის გენერალურმა დირექტორმა, ნიკა გვარამიამ ცოტა ხნის წინათ გამართულ ბრიფინგზე გააკეთა.

მისი თქმით, „ამ ისტორიის მთავარი გასაღები ილია მეორეს აქვს" და იმედოვნებს, რომ აღნიშნულ საქმესთან დაკავშირებით, სიმართლე მალე გაირკვევა.

„დღევანდელი განცხადებები არ ეხება მხოლოდ მოსამართლეების დაშინების საკითხს. ეს ხმაური ეხება საპატრიარქოსთან დაკავშირებით მიმდინარე მოვლენებს, სადაც ხელისუფლებას აქვს უმძიმესი პრობლემა - უმძიმესი პრობლემა ეკლესიის საქმეებში უხეში და დანაშაულებრივი ჩარევის. ამას „რუსთავი 2" უკვე ორი დღეა ამხელს - ხელისუფლებასაც და ეკლესიის შიგნით მყოფ ზოგიერთ პიროვნებას, რომელიც ხელისუფლებასთან შეთანხმებულად მოქმედებს. ესეც არის ერთ-ერთი საკითხი, რომლის გადაფარვასაც ცდილობს ხელისუფლება.

საქართველოს ხელისუფლება ჩაბმულია შეთქმულებაში ქართული ეკლესიის წინააღმდეგ, როგორც ჩანს მათი რეაქციებიდან; როგორც ჩანს ჩვენს მიერ მოპოვებული დოკუმენტებიდან და როგორც იმედი მაქვს, გამოჩნდება მოგვიანებით გაკეთებული მაღალი იერარქების განცხადებებიდან. არ გამოვა ამ ყველაფრის გადაფარვა. უმძიმეს მდგომარეობაში ხართ „რუსთავი 2"-ის საქმესთან დაკავშირებით და საპატრიარქოსთან დაკავშირებითაც. ღვთის წყალობით, პატრიარქი ილია მეორე ჯანმრთელად არის და მთავარი გასაღები ამ ისტორიაში აქვს მას. მე ძალიან მიხარია, რომ  ეს ასეა. მიხარია, პირველ რიგში, იმ კონფესიის, იმ სამწყსოს წარმომადგენელს, რომელსაც თავს მივაკუთვნებ - მართლმადიდებლურ სამწყსოს ვგულისხმობ და რომლის მეთაურია ილია მეორე და მიხარია ასევე იმიტომ, რომ სიმართლე ძალიან მალე გაირკვევა", - განაცხადა ნიკა გვარამიამ.