საკმაოდ ძლიერი ორგანიზმი ვართ და აბსოლუტურად ყველას პასუხსაც გავცემთ და თავის ადგილს მივუჩენთ, - აღნიშნული განცხადება ბერლინში ჟურნალისტებთან საუბრისას ქორეპისკოპოსმა იაკობმა გააკეთა.

იგი ჭყონდიდის მიტროპოლიტის, მეუფე პეტრე ცაავას მიერ გაჟღერებულ ბრალდებებს გამოეხმაურა და აღნიშნა, რომ მეუფეს შეუძლია აღნიშნულთან დაკავშირებით სინოდს წერილობით მიმართოს.

მისივე განცხადებით, მიტროპოლიტ ცაავას შორენა თეთრუაშვილთან აქვს პრობლემა.

„მეუფე პეტრეს შეუძლია დაწეროს და შემოიტანოს სინოდში ან პირადად გვითხრას. ეტყობა, მეუფე პეტრეს კურირებს და მეუფე პეტრეს პრობლემა აქვს მაგ ადამიანთან. ჩემთან პატრიარქის გარდა, ჩემს საქმეში ვერავინ ვერ ერევა. ეკლესია გახსნილია ისედაც, არასდროს არ დუმს თუ რამე პრობლემაა ქვეყანაში თუ შიგნით, მაგრამ მე რა ვიცი,  ბევრი ისეთი ადამიანი ვნახე ვითომ ეკლესიის პრობლემებზე რომ საუბრობს, თვითონ რომ ქმნიდა ხოლმე პრობლემებს. უშუალოდ ახლა მეუფე პეტრეს არ ვგულოსხმობ, სხვები ვნახე მასეთი. ეს არის ვიღაცების დაკვეთა. ჩვენთან დისონანსს ვერ შემოიტანენ. საკმაოდ ძლიერი ორგანიზმი ვართ და აბსოლუტურად ყველას პასუხსაც გავცემთ და თავის ადგილს მივუჩენთ", - განუცხადა ჟურნალისტებს მეუფე იაკობმა.

ჭყონდიდელმა მიტროპოლიტმა, მეუფე პეტრე ცაავამ შორენა თეთრუაშვილის მისამართით ბრალდებები „რუსთავი 2"-ის გადაცემაში „არჩევანი" გააჟღერა.    

შორენა თეთრუაშვილი „მისი გარემოცვის წევრებს, რამდენიმე სასულიერო პირს, მისი დავალებების კარგად შემსრულებლებს ეძახის „ოქროს თევზს”. ეს არის პროტოპროსვიტერი გიორგი, ქორეპისკოპოსი თეოდორე პირველ რიგში, რომელიც ფინანსურ საკითხებში არის ყველაზე მეტად ჩართული.    

რაც შეეხება მეუფე იაკობს, ის არის ძალიან პატრიოტი ადამიანი. მე ვფიქრობ, რომ შეცდომაშია შესული, რაღაც პიროვნული დაპირისპირებით, ჩართულია, სამწუხაროდ, ამ ქალბატონის მიერ დაწყებულ ინტრიგებში, უნებლიეთ არის თანამონაწილე", - განაცხადა მეუფე პეტრე ცაავამ.