ექსპერტი ვახტანგ ძაბირაძე რიგგარეშე საპარლამენტო არჩევნების ჩატარების იდეას ემხრობა და ამბობს, რომ ეს „ქართული ოცნებისთვისაც“ და ქვეყნისთვისაც კარგი იქნება.“ მისი თქმით, დღეს „ნაციონალურ მოძრაობას“ არ გააჩნია იმის რესურსი, რომ  ის ამ მთავრობისთვის  სერიოზულ საფრთხეს წარმოადგენდეს და აქედან გამომდინარე, ამ პოლიტიკური ძალის საუბარი რიგგარეშე არჩევნებზე, „კონტრპროდუქტიულია“. ამის შესახებ ვახტანგ ძაბირაძემ „კვირის პალიტრასთან“ ისაუბრა.


„ველოდებოდი, რომ „ნაციონალური მოძრაობის“ აქციაზე 20 ათასამდე  კაცი მაინც მოვიდოდა.  მთლინობაში   „ნაციონალურ მოძრაობას“ არ გააჩნია იმის რესურსი, რომ  ის ამ მთავრობისთვის  სერიოზულ საფრთხეს წარმოადგენდეს.  მას არ აქვს  მოსახლეობის დიდი მხარადჭერა. პირიქით,  როცა  „ნაციონალური მოძრაობა“   ლაპარაკობს რიგგარეშე არჩევნებზე, ეს უკვე კონტრპროდუქტიულია. ე.ი. მოსახლეობა ყოველგავარი ბრმა ანალიზის  გარეშე, ინტუიციურად  საწინააღმდეგო აზრზე დგება. რაც შეეხება იმას, შეძლებენ თუ არა ისინი მომავალში პერმანენტული  და ხალხმრავალი აქციების გამართვას, ესეც ხელისუფლებაზეა დამოკიდებული. თუ ეს უკანასკნელი ისე მოიქცევა, როგორც მოიქცა  და ოპოზიცის მიტინგებს ხელს არ შეუშლის, სიტუაცია არ დაიძაბება.  


რაც შეეხება რიგგარეშე არჩევნების დანიშვნის თემას, მე თუ მკითხავთ, ეს „ნაცმოძრაობას“ ხელს არც აძლევს.   ვფიქრობ, „ქართული ოცნებისთვისაც“ და ქვეყნისთვისაც კარგი იქნება, თუ დაინიშნება რიგგარეშე არჩევნები,“ განაცხადა ვახტანგ ძაბირაძემ.