ამ უკიდურეს ნაბიჯზე „რუსთავი 2" წავიდა იმიტომ, რომ ეს გათიშვა იყოს ერთდღიანი და საქართველომ არ მიიღოს ის სურათი, რისი მიღებაც უნდა ხელისუფლებას - სამუდამოდ გათიშული „რუსთავი 2", - აღნიშნული განცხადება „ევროპული საქართველოს" ერთ-ერთმა ლიდერმა, დავით ბაქრაძემ ჟურნალისტებთან საუბრისას გააკეთა.

მისი თქმით, სამაუწყებლო კომპანიის პროტესტი საზოგადოების გამოღვიძებას ემსახურება.

„მე იმედი მაქვს, რომ ხვალ, აქციაზე, სადაც ყველამ ერთად უნდა დავიცვათ სიტყვის თავისუფლება, ჩვენი საზოგადოება მოვა, ჩვენი საზოგადოება ხმამაღლა იტყვის თავის სათქმელს", - განაცხადა დავით ბაქრაძემ.

„რუსთავი 2” გადადის საპროტესტო მაუწყებლობაზე, - აღნიშნული განცხადება სამაუწყებლო კომპანიის ჟურნალისტმა, ზაალ უდუმაშვილმა „კურიერის" სპეციალურ გამოშვებაში წუხელ გააკეთა.

უდუმაშვილის თქმით, ტელეკომპანია პროტესტის უკიდურეს ფორმას იყენებს.

„მე მინდა „რუსთავი 2"-ის სახელით ერთი მნიშვნელოვანი განცხადება გავაკეთო. გვერწმუნეთ, ამ გადაწყვეტილების მიღება არ იყო ადვილი ჩვენთვის. ეს არის პროტესტის უკიდურესი ზომა, რომელსაც შესაძლოა ტელევიზიამ მიმართოს, თუმცა, ჩვენ დღეს სხვა გამოსავალი არ დაგვიტოვეს. ჩვენი დუმილით ჩვენ შევეცდებით ხმა ყველას მოგაწვდინოთ. დღეიდან, უფრო ზუსტად კი ამ წუთიდან „რუსთავი 2” გადადის საპროტესტო მაუწყებლობაზე. ყველას გელოდებით კვირას, 14:30 საათზე, რუსთაველზე, პარლამენტის შენობის წინ. ერთად დავიცვათ „რუსთავი 2” და სიტყვის თავისუფლება”, - განაცხადა ჟურნალისტმა „კურიერის" სპეციალურ გამოშვებაში.