მე ვარ იურისტი, მამა გიორგის ინტერესების დამცველი და თითოეული სიტყვა, რასაც ვამბობ, შეთანხმებული მაქვს მამა გიორგისთან, - აღნიშნული განცხადება დაკავებული დეკანოზის ადვოკატმა, გიორგი ფანცულაიამ ჟურნალისტებთან საუბრისას გააკეთა.

მან მის მიმართ გამოთქმულ ბრალდებებს უპასუხა და განაცხადა, რომ „პოლიტიკური ქულების დაწერასა" და „პოლიტიკური კარიერის გაკეთებას" არ აპირებს.

„ჩემს ამ საქმეში მონაწილეობასთან დაკავშირებით, ამ დღეების განმავლობაში, გაკეთდა არაერთი განცხადება, შეფასება და მე მაქსიმალურად ვცდლობდი, რომ ეს "გამეტარებინა", არ მიმეღო მხედველობაში და არ გამეკეთებინა კომენტარი, მაგრამ მინდა ადრესატებმა გაიგონ - საქართველოში ერთხელ და სამუდამოდ, უნდა გაიმიჯნოს საადვოკატო საქმიანობა პოლიტიკისგან. მე ამ საქმისგან არ ვაპირებ პოლიტიკური კარიერის გაკეთებას, არ ვაპირებ პოლიტიკური ქულების დაწერას. აქედან გამომდინარე, მე ვაკეთებ მხოლოდ პროფესიულ, იურიდიულ განცხადებებს და არ ვსაუბრობ იმ ტერმინოლოგიით, ვისაც პოლიტიკური ქულების ჩაწერა უნდა. ნურას უკაცრავად....

მე გამოვდივარ მამა გიორგის ინტერესებიდან, რომ მაქსიმალურაც მოხდეს ამ საკითხის პოლიტიკიდან დისტანცირება. კიდევ ერთხელ ვამბობ, არ მაინტერესებს პოლიტიკური ქულების დაწერა. მაინტერესებს ერთადერთი რამ, გაირკვეს მისი უდანაშაუალობა და ის, თუ ვინ მოუწყო ეს. გადახედეთ სოციალურ ქსელებს თუ როგორი შეფსება კეთდება. მოვუწოდებ ყველას, დაამთავრეთ ეს ჭაობი და პროფესია ნუ გერევათ პოლიტიკაში. მე ვარ იურისტი, მამა გიორგის ინტერესების დამცველი და თითოეული სიტყვა, რასაც ვამბობ, შეთანხმებული მაქვს მამა გიორგისთან. თქვენი პოლიტიკა შეინახეთ თქვენთვის" - განაცხადა ფანცულაიამ, რომელიც ცოტა ხნის წინათ, ჩაფიძის კლინიკაში მამა გიორგი მამალაძის სანახავად მივიდა.