ტელეკომპანია „ობიექტივი" საქართველოს პატრიარქის, უწმინდესისა და უნეტარესის, ილია მეორის ვიდეომიმართვის სრულ ვერსიას ავრცელებს.

ტელეკომპანიაში აცხადებენ, რომ 16 თებერვალს გავრცელებული ვიდეო დამონტაჟებულია, დღეს კი მათივე მტკიცებით, „ობიექტივმა" მიმართვის სრული ჩანაწერი მოიპოვა.

ტელეკომპანიის მიერ გავრცელებული ჩანაწერის თანახმად, ზუგდიდისა და ცაიშის ეპარქიის „ფეისბუქ" გვერდზე გავრცელებულ ჩანაწერში არ არის მონაკვეთი, სადაც პატრიარქი ამბობს:

„რა მოხდა, რატომ მოხდა, რომ მამა გიორგი ლაპარაკობს ხან ერთს, ხან - მეორეს, ვისი დავალებით ხდება ეს?".

„ობიექტივის“ მიერ გავრცელებული პატრიარქის მიმართვის სრული ვერსია ასეთია:

„მწუხარება და სიხარული ტყუპი ძმებივით დადიან ერთად. როცა ადამიანი სიხარულშია, ის უნდა ელოდოს მწუხარებას. ჰოი, მწუხარებავ, შენ საწყისი ხარ სიხარულის. ჰოი, სიხარულო, შენ საწყისი ხარ მწუხარებისა. ეს არის აღმოსავლური სიბრძნე. სამწუხაროდ, მე მომიხდა გერმანიაში ჩამოსვლა და გამიკეთეს ნაღვლის ოპერაცია. ოპერაცია კარგად დამთავრდა, კარგი შედეგებია და ექიმები იტყვიან ამის შესახებ. მე ასევე მინდა შევეხო იმ უცნაურ და რაღაც არანორმალურ სიტუაციას, რომელიც დაკავშირებულია მამა გიორგი მამალაძესთან. მე ვიცნობ მამა გიორგის უკვე კარგა ხანია და კარგის მეტი მე არაფერი მომისმენია და მინახავს მისგან. რა მოხდა, რატომ მოხდა, რომ მამა გიორგი ლაპარაკობს ხან ერთს, ხან - მეორეს, ვისი დავალებით ხდება ეს?

მე მინდა ვთქვა ერთი რამ, რომ ჩვენი ეკლესია და ქვეყანა და ქართველი ხალხი, საქართველოს მოსახლეობა მუდამ იყო ერთი გამთლიანებული ორგანიზმი და იქნება მომავალში. ვერავინ ვერ შეძლებს ჩვენი ერისა და ეკლესიის დარღვევას. მე სამ დღეში ჩამოვალ თბილისში და იმედი მაქვს, ყველაფერი დამშვიდდება, გაირკვევა და ყველაფერი ნორმაზე დადგება. ღმერთმა დაგლოცოთ თქვენ და სრულიად საქართველო“, - ამბობს პატრიარქი ვიდეოში.

პატრიარქის ვიდეომიმართვა ბერლინიდან, თავდაპირველად, ორი დღის წინათ ზუგდიდისა და ცაიშის ეპარქიის „ფეისბუქის“ გვერდმა ორ ნაწილად გაავრცელა.