საქართველოს პარლამენტის თავმჯდომარემ, ირაკლი კობახიძემ საქართველოში ვიზიტად მყოფი ამერიკის შეერთებული შტატების კონგრესის დელეგაცია მიიღო.

პარლამენტის პრესსამსახურის ცნობით, შეხვედრაზე ორმხრივი ურთიერთობებისა და თანამშრომლობის გაღრმავებაზე ისაუბრეს. მხარეებმა განიხილეს სახელმწიფო საკონსტიტუციო კომისიის საქმიანობა. როგორც პარლამენტის თავმჯდომარემ შეხვედრისას განაცხადა, კომისიის მუშაობის პროცესი ინკლუზიურია და ყველა გადაწყვეტილება ფართო კონსესუსის შედეგად იქნება მიღებული.

შეხვედრაზე ისაუბრეს საქართველოს საგარეო მიმართულებების შესახებ რეზოლუციაზე, რომელიც საქართველოს პარლამენტმა ერთხმად მიიღო და რომელშიც საქართველოს ევროპული და ევროატლანტიკური ინტეგრაციის შესახებ ქართველი ხალხის მყარი და ურყევი ნება ცალსახად არის ასახული. რეზოლუციაში ასევე ხაზგასმით არის აღნიშნული, ამერიკის შეერთებული შტატების, როგორც საქართველოს მთავარი სტრატეგიული პარტნიორის განსაკუთრებული მნიშვნელობა.

ყურადღება გამახვილდა ნატოს საპარლამენტო ასამბლეაზე, რომელიც 2017 წლის მაისში საქართველოში გაიმართება. როგორც კონგრესმენებმა შეხვედრაზე განაცხადეს, ამ ფაქტით კიდევ ერთხელ დასტურდება, რომ საქართველო ალიანსის მნიშვნელოვანი პარტნიორია.

მხარეებმა საქართველოს ოკუპირებულ ტერიტორიებზე არსებული ვითარების შესახებაც ისაუბრეს. აშშ-ის კონგრესის დელეგაციამ, რომელსაც კონგრესმენი პიტერ როსკამი ხელმძღვანელობს, ირაკლი კობახიძეს საქართველოს ტერიტორიული მთლიანობისა და სუვერენიტეტის მხარდაჭერა დაუდასტურა. მისივე თქმით, ამერიკის შეერთებული შტატები მხარს უჭერს საქართველოს ევროპულ და ევროატლანტიკურ სტრუქტურებში ინტეგრაციას და დადებითად აფასებს იმ რეფორმებს, რომლებსაც ქვეყანა დემოკრატიული განვითარების პროცესში ახორციელებს.

მხარეები საქართველოს პარლამენტსა და აშშ-ის კონგრესს შორის თანამშრომლობის შემდგომ გაღრმავებასა და მჭიდრო თანამშრომლობაზე შეთანხმდნენ.