„რუსთავი 2" იყო გამარჯვებული ხალხის ტელევიზია, დღეს ის არის გაჭირვებული ხალხის ტელევიზია, - აღნიშნული განცხადება „ევროპული საქართველოს" ერთ-ერთმა ლიდერმა, დავით ბაქრაძემ უზენაეს სასამართლოსთან „რუსთავი 2"-ის მხარდამჭერ აქციაზე გააკეთა.

მისი თქმით, „რუსთავი 2"-ის დაცვით ის არა ტელეკომპანიას, არამედ ქვეყნის და საკუთარ მომავალს იცავს.

„ეს არ არის „რუსთავი 2"-ის დაცვის დღე, დღევანდელ დღეს აქ მოსვლით მე ვიცავ ჩემს საკუთარ საქართველოს, ვიცავ ჩემს საკუთარ მომავალს და ვიცავ იმას, რომ საქართველოს ჰქონდეს უკეთესი ხვალინდელი დღეს პერსპექტივას რომ საქართველოში არსებობდეს განსხვავებული აზრი, რომ საქართველოში იყოს კრიტიკული და თავისუფალი მედია.... უნდა გვესმოდეს რომ „რუსთავი 2"-ის გაჩუმებით ამ ქვეყანაში ჩუმდება ის მთავარი სატელევიზიო არხი, რომელიც საუბრობს თქვენს პრობლემებზე, თქვენს გაჭირვებაზე. რომელიც საუბრობს იმაზე როგორ გატყუებთ მთავრობა, როგორ იწყობს ცხოვრებს ხელისუფლება პრემიებით, დანამატებით, თანამდებობებით და როგორ არ ზრდის პენსიას, სოციალურ დახმარებას, არ ასრულებს დაპირებებს. ამას კარგავთ თქვენ,“-მიმართა ბაქრაძემ მოსახლეობას.„რუსთავი 2 15 წლის წინ იყო გამარჯვებული ხალხის ტელევიზია, მაგრამ დღეს „რუსთავი 2" არის გაჭირვებული ხალხის ტელევიზია, იმიტომ, რომ არის ერთადერთი არხი, რომელიც ამ ქვეყანაში საუბრობს ხალხის გაჭირვებაზე,“ - განაცხადა დავით ბაქრაძემ.