„რუსთავი2“-ის გენერალური დირექტორი ნიკა გვარამია ქიბარ ხალვაშს სთავაზობს, „რუსთავი 2” მის კოლექტივს მიჰყიდოს.

ამის შესახებ გვარამიამ წუხელ გამართულ საგანგებო ბრიფინგზე განაცხადა.

„რუსთავი 2" არის ამ ქვეყნის ერთადერთი მსხვილი კრიტიკული მედია და დღეს გამოცხადდა ბიძინა ივანიშვილისთვის გადაცემის შესახებ. ჩვენ მივიჩნევთ, რომ ქვეყანაში ვითარება უკიდურესად დაიძაბა. საქართველოს საერთაშორისო იმიჯი, გამომდინარე იმ განცხადებებიდან, რაც უკვე გაკეთდა, ძალიან სერიოზული საფრთხეები წინაშე დადგა. ამიტომ „რუსთავი 2"-ის გუნდი აკეთებს შემდეგ განცხადებას: მიუხედავად იმისა, რომ ჩვენ არ ვაღიარებთ უკანონო გადაწყვეტილებას და მივიჩნევთ მას პოლიტიკურ და არასამართლებრივ გადაწყვეტილებად, ფორმლაურად, ის არის მაინც ძალაში. ჩვენ გვქონდა კონსულტაციები მესაკუთრეებთან, რომლებიც ნამდვილად კანონიერი მესაკუთრეები არიან, მიუხედავად იმისა, რას იტყვის 9 სულგაყიდული მოსამართლე, მათ ექნებათ საერთაშორისო სასამართლო დავები ქიბარ ხალვაშთან.

რადგან ოფიციალურად დეკლარირებულია, რომ „რუსთავი 2“-ის სარედაქციო პოლიტიკის შენარჩუნება არის მნიშვნელოვანი, რადგან „ტვ პირველის“ ეთერში და მადლობა ამ კომპანიას, ქიბარ ხალვაშმა გააკეთა განცხადება, რომ მისთვის ეს არის ბიზნესის საკითხი და იგი აპირებს „რუსთავი 2“-ის გაყიდვას, ვაკეთებთ შემდეგ შეთავაზებას: ჩემს უკან დგანან ადამიანები, ვის მხარზეც დგას დღეს „რუსთავი 2“. გადაეცით „რუსთავი 2“ მის კოლექტივს.

თუ გნებავთ ნამდვილად და არ იტყუებით, თუ არ გინდათ ამ ქვეყანაში ერთხმად აჟღერებული ტელევიზია, გადაეცით „რუსთავი 2“ კოლექივს. რაც შეეხება ქიბარ ხალვაშის კომერციულ ინტერესებს, იგი სასამართლოში დავობდა 7 მილიონ ლარზე ოდნავ მეტს. ჩვენ დავთვალეთ და ეს არის 4 209 397 დოლარამდე, დღეის მდგომარეობით, იმ კურსით, რომელიც მაშინ იყო. მას გარკვეული რაოდენობა მიღებული აქვს. დარჩენილ თანხას 3 944 397 დოლარს გადავიხდით ჩვენ. მას ხომ გაყიდვა უნდა ტელეკომპანიის, ჩვენ მივმართავთ ქიბარ ხალვაშს და მის პატრონს, საქართველოს მთავრობას, ამ ადამიანებს გადაეცით „რუსთავი 2“ და თქვენ კომერციულ ინტერესს ჩვენ დავაკმაყოფილებთ“, - განაცხადა ნიკა გვარამაიამ.