„რუსთავი 2"-ის საქმეზე უზენაესი სასამართლოს გადაწყვეტილებას „ლეიბორისტული პარტიის" ლიდერი შალვა ნათელაშვილი ეხმაურება.

იგი მიიჩნევს, რომ ტელეკომპანიასთან დაკავშირებული საქმე პოლიტიკურად მოტივირებულია.

„ეს არ ეხება მხოლოდ ერთ ტელეკომპანიას - სასწორზე დგას საკითხი - ჩვენ მოვახდენთ ივანიშვილის რეჟიმის დემონტაჟს თუ ივანიშვილი მოახდენს საქართველოს დემონტაჟს და ჩვენ უნდა მოვახდინოთ ამ ხელისუფლების დემონტაჟი. ეს არის ჩვენი ისტორიული მოვალეობა და ამოცანა. მთელი საქართველო, თითოეული მისი მოქალაქე უნდა გადაიქცეს წინააღმდეგობის და დაუმორჩილებლობის სუბიექტად. ეს წინააღმდეგობა უნდა გადაიზარდოს მასორივ საპროტესტო მოძრაობაში, რომლის შედეგადაც, მთავრობა წავა სახლში ან ციხეში, ხოლო გლობალურად ჩატარდება ახალი საპარლამენტი არჩევნები. ჩვენ მივმართავთ ევროპის სასამართლოს სტრასბურგში, შეაჩეროს საქართველოს უზენაესი სასამართლოს პოლიტიკური და უღირსი გადაწყვეტილება, რომელიც გუშინ მიიღეს. მივმართავთ ამერიკის შეერთებული შტატების კონგრესს და ევროპის კავშირს - გაყინონ ივანიშვილის სისხლიანი კრიმინალური ანგარიშები თავიანთი ქვეყნის ბანკებში და ეს გააკეთონ რაც შეიძლება სწრაფად. მივმართავთ ჰააგის სისხლის სამართლის ტრიბუნალს, დაჩქარდეს ივანიშვილის მიმართ ჩვენ მიერ შეტანილი აპელაციის განხილვა და ამ საშიში კრიმინალის პასუხისგებაში მიცემის პროცესი", - განაცხადა ნათელაშვილმა, რომელმაც ბიძინა ივანიშვილს „საქართველოს უბოროტესი მტერი" უწოდა.

„პირდაპირ გულში აღმოგვიცენდა მოსიარულე ბოროტება, რომელსაც ხეები უფრო უყვარს ადამიანებზე, მის მიერ მოტყუებულ ადამიანებზე. რომელსაც ცხოველები უფრო უყვარს, თავისი საკუთარი ცხოველები თავის ქვეყანაზე და ჩვენ ეს ბოროტება, ეს ჭირი, ეს სახადი უნდა მოვიცილოთ", - განაცხადა ნათელაშვილმა.