საქართველოს პარლამენტის თავმჯდომარე პრეზიდენტის არჩევის წესსა და სახელმწიფო საკონსტიტუციო კომისიის მუშაობასთან დაკავშირებით, პრეზიდენტის გუშინდელ განცხადებას ეხმაურება და „არაკორექტულს" უწოდებს.

ირაკლი კობახიძე აცხადებს, რომ თუ გიორგი მარგველაშვილი „გააგრძელებს არაკორექტული განცხადებების გაკეთებას, შეიძლება ვიფიქროთ, რომ მომავალ წელს არაპირდაპირ არჩევნებზე გადავიდეთ".

„სისტემური მიდგომიდან გამომდინარე მიგვაჩნია, რომ უმჯობესია, საქართველოს პრეზიდენტის არაპირდაპირ არჩევაზე გადავიდეთ და ეს ეფუძნება იმ სისტემის საერთო ხედვას, რომელიც წარმოვადგინეთ ჩვენი პოზიციიდან. ერთ-ერთი მიზეზი, რის გამოც ჩვენ ეს პოზიცია წარმოვადგინეთ, იყო ის, რომ მათ შორის, ჩვენ პრეზიდენტის პოზიციასაც გავუწიეთ ანგარიში. პრეზიდენტის პოზიცია იყო ის, რომ მისი შეხედულებით, ჯობდა ჩვენ მომავალ წელს არ გაგვეუქმებინა პირდაპირი არჩევნები. ჩვენ ანგარიში გავუწიეთ პრეზიდენტის ამ პოზიციასაც და ესეც საფუძველი იყო იმისა, რომ არჩევანი შევაჩერეთ ორსაფეხურიან რეფორმაზე. თუ საქართველოს პრეზიდენტი გააგრძელებს არაკორექტული განცხადებების კეთებას, ამ შემთხვევაში, შეიძლება ვიფიქროთ ჩვენი პოზიციის გადახედვაზე და შეიძლება ვიფიქროთ იმაზე, რომ პირდაპირი არჩევნები არ ჩავატაროთ მომავალ წელს და პირდაპირ გადავიდეთ არაპირდაპირ არჩევნებზე. სხვა განცხადების გაკეთება მე პრეზიდენტის ამ არაკორექტულ განცხადებასთან დაკავშირებით უბრალოდ არ შემეძლო“, - განაცხადა კობახიძემ სახელმწიფო საკონსტიტუციო კომისიის სამუშაო ჯგუფის გაერთიანებულ სხდომაზე.

ქართველ ხალხს არ უნდა წაერთვას პრეზიდენტის არჩევის უფლება, - აღნიშნული განცხადება კი საქართველოს პრეზიდენტმა, გიორგი მარგველაშვილმა გუშინ გამართულ საგანგებო ბრიფიგზე გააკეთა.    

მარგველაშვილმა აღნიშნა, რომ აუცილებელია ასევე, კონსტიტუციის გადახედვის პროცესში, ქართველ ხალხს მიეცეს შესაძლებლობა თავისი პოზიციის დაფიქსირების.    

„ნათლად დაფიქსირდა, რომ საკონსტიტუციო კომისიაში, არა კონსტიტუციის შინაარსობრივ და სიღრმისეულ გადახედვასთან გვაქვს საქმე, არამედ საუბარი არის კონკრეტული პოლიტიკოსის, კონკრეტულ პოლიტიკოსთან დაკავშირებული გადაწყვეტილებების მიღებასთან. როდესაც ლაპარაკია იმაზე, თუ რა გადაწყვეტილება იქნება მიღებული კონკრეტულად ერთი პოლიტიკოსის, კონკრეტულად მოქმედ პრეზიდენტთან მიმართებაში, ეს ნათლად აჩვენებს, რომ მოტივაცია პროცესისა არის არა კონსტიტუციის შინაარსობრივი გადახედვა, არამედ ამ კონკრეტულ პოლიტიკოსთან დაკავშირებული შეხედულებები", - განაცხადა გიორგი მარგველაშვილმა.