ირაკლი ღარიბაშვილმა დღეს მასმედიასთან შეხვედრაზე ლარის კურსთან დაკავშირებითაც ისაუბრა და კიდევ ერთხელ ხაზი გაუსვა, რომ  სავალუტო პროცესები სწორედ საგარეო ფაქტორების ზეგავლენას უკავშირდება. ღარიბაშვილმა აღნიშნა, რომ მთავრობა უცხოეთიდან რამდენიმე ასეული მილიონი დოლარის შემოდინებას ელოდება, რაც ლარის კურსის დასტაბილურებას გამოიწვევს.

 

“სავალუტო კუსზე დიდი ზეგავლენა მოახდინა დოლარის გამყარებამ მთელ მსოფლიოში აბსოლუტურად ყველა ვალუტის მიმართ, მათ შორის ევროს მიმართაც და აგრეთვე რეგიონში არსებულმა რთულმა ეკონომიკურმა, პოლიტიკურმა პრობლებმა განაპირობა ის, რომ ჩვენი ვალუტა გაუფასურდა, მაგრამ მე მინდა გითხრათ, რომ ჩვენ არ ვართ გამონაკლისი. მე როგორც გითხარით, ეს შეეხო რეგიონის ყველა ქვეყანას. მინდა რამდენიმე მაგალითი მოგიყვანოთ. ჩვენი მეზობელი და მეგობარი ქვეყანა აზერბაიჯანი, რომელიც არის ჩვენზე ორჯერ, სამჯერ მეტად მდიდარი სახელმწიფო, გეტყვით რომ დეკემბერში აზერბაიჯანმა დახარჯა 1,2 მილიარდი დოლარი იმისათვის, რომ შეენარჩუნებინა კურსი იანვარში. სომხეთში საგანგებო ვითარებაა, დახარჯეს ნახევარი მილიარდი და შეიძლება უფრო მეტი, 600 მილიონი დოლარი, მაგრამ ვერ შეინარჩუნეს კურსი. მოლდოვაში იგივე ვითარებაა, 700 მილიონი დაიხარჯა მათი რეზერვებიდან და გვაქვს პრაქტიკულად იგივე ვითარება, რაც სხვა ქვეყნებში. ანალოგიური ვითარება არის ევროპის სხვა სახელმწიფოებში, ევროს მიმართაც გამყარდა დოლარი და რა თქმა უნდა ჩვენი სავაჭრო პარტნიორები უკრაინა და იქ განვითარებული მოვლენები ნეგატიურ ეფექტს ტოვებს ჩვენს ეკონომიკაზე. ასევე რუსეთში განვითრებული მოვლენები და ზოგადად რეგიონებში არსებული რთული ვითარება,” განაცხადა ღარიბაშვილმა.