მე ვარ ძალიან გაბრაზებული საქართველოს მტრებზე - ივანიშვილზე, რომელმაც პრაქტიკულად ნულზე დაიყვანა ის, რაც ჩვენ საუკუნეების განმავლობაში შევქმენით, - აღნიშნული განცხადება საქართველოს ყოფილმა პრეზიდენტმა, მიხეილ სააკაშვილმა „ერთიანი ნაციონალური მოძრაობის“ ქალთა ორგანიზაციის მეორე ყრილობაზე ჩართვისას გააკეთა.

სააკაშვილი ვიზა-ლიბერალიზაციის საკითხსაც გამოეხმაურა. მისი თქმით, „ქვეყანა მათ უნდა დავატოვებინოთ, ვინც საჭმლის ფული არ დაგვიტოვა".

„მხვდებიან ხოლმე სადღაც ქართველები, პირველი კითხვაა, აბა გადაგიარა წყენამ საქართველოზე? არასდროს არ ვყოფილვარ და ვერ ვიქნები ნაწყენი საქართველოზე, ჩემს ხალხზე, მაგრამ მე ვარ ძალიან გაბრაზებული საქართველოს მტრებზე, ივანიშვილზე, რომელმაც, პრაქტიკულად, ნულზე დაიყვანა ის, რაც ჩვენ საუკუნეების განმავლობაში შევქმენით, მაგრამ ხომ ჩვენ შევქმენით, ხომ ცოცხლები ვართ, ხელახლა ავაშენებთ იმიტომ, რომ ვინც ერთხელ ააშენა, მეორეჯერ, მესამეჯერ, მეოთხეჯერ ააშენებს. ახლა ჩვენ მოგვცეს უვიზო მიმოსვლა, რა თქმა უნდა, ბევრი ნორმალური ადამიანი ისევ იფიქრებს საქართველოს დატოვებაზე. მე მინდა ვთქვა, რომ რა თქმა უნდა, ვიმოგზაუროთ, ვიცი, რომ გვიჭირს, ბევრი პრობლემაა, ვიცი, რომ საჭმლის ფულის პრობლემაა, მაგრამ დატოვების დრო არ არის. მოდი, იმათ დავატოვებინოთ, ვინც საჭმლის ფული არ დაგვიტოვა; მოდი, იმათ დავატოვებინოთ, ვინც საარსებო სივრცე გადაგვიკეტა, მაგრამ თქვენ ნუ წახვალთ,“ - განაცხადა მიხეილ სააკაშვილმა.

„ნაციონალური მოძრაობის" ქალთა ორგანიზაციას თინა ბოკუჩავა უხელმძღვანელებს. გადაწყვეტილება ორგანიზაციის 600-მდე დელეგატმა ერთხმად მიიღო. დღესვე ქალთა ორგანიზაციის ყრილობაზე მმართველი საბჭოს 15 წევრი აირჩიეს.