საპარლამენტო უმრავლესობის ლიდერი არჩილ თალაკაძე „რუსთავი 2"-ის საქმეზე მიმდინარე პროცესებს ეხმაურება და აცხადებს, რომ „რაც შეეხება უცნაურ სიხარულს და ნიშნისმოგებას, რომელიც მიმდინარე მოვლენებთან დაკავშირებით პოლიტიკაში და გარკვეულ ჯგუფებს შორის შეინიშნება, მერწმუნეთ, რომ მომდევნო თვეში ეს ყველაფერი დასრულდება".

თალაკვაძის თქმით, საქართველოს არანაირი უკუსვლა არ ექნება მედიის თავისუფლების თვალსაზრისით.

„ჩვენ გვაქვს გაცილებით კარგი მდგომარეობა, ვიდრე საქართველოს არაკეთილმოსურნეებს ჰგონიათ. გვაქვს 5%-ზე მაღალი ეკონომიკური ზრდა, ასევე ვიზა-ლიბერალიზაცია. იწყება მსხვილი ინფრასტრუქტურული პროექტები და გველოდება გადატვირთული ტურისტული სეზონი, რომელიც კიდევ უფრო მეტ შემოსავალს მოუტანს ქვეყანას. ეს არის ის მოცემულება რომელიც დღეს გვაქვს ქვეყანაში..... „რუსთავი 2“-თან დაკავშირებით კიდევ ერთხელ მინდა გავიმეორო, ვერანაირი გადაწყვეტილება ვერ შეცვლის ჩევენს ქვეყანაში ჟურნალისტების დამოუკიდებელ პროფესიულ საქმიანობას. ვერანირი ჩარევა ვერ მოხდება ამ სფეროში და ბუნებრივია, შესაბამისად, რა გადაწყვეტილებაც არ უნდა მიღებულიყო, მე არ ველოდები ამ მიმართულებით რამე ცვლილებას. ყველა ჟურნალისტი ჩვეულ რეჟიმში გააგრძელებს დამოუკიდებლად პროფესიულ საქმიანობას. საქართველოს სჭირდება ობიექტური მედია. მედია, რომელსაც აქვს მაღალი სტანდარტები. ხელისუფლებას სჭირდება კრიტიკული მედია, რომ გაითვალისწინოს ის შენიშვნები, რაც მის საქმიანობასთან დაკავშირებით არსებობს", - განაცხადა თალაკვაძემ ჟურნალისტებთან საუბრისას.