წერილის შინაარსი ვიცი, გავეცანი და შესაბამისად, ჩვენი პასუხიც იქნება წარმოდგენილი უახლოეს დღეებში, განაცხადა ვიცე პრემიერმა, ენერგეტიკის მინისტრმა კახა კალაძემ ევროპარლამენტარების მიერ „რუსთავი 2"-ის საქმეზე პრემიერ მინისტრისთვის გამოგზავნილ წერილთან დაკავშირებით.

კითხვაზე, ხედავს თუ არა იმ საფრთხეებს რეალურად, რაზეც საუბარია წერილში, კალაძე პასუხობს:

„მე ისევ ჩემს აზრზე ვრჩები - საქართველოში არც ერთ მედიასაშუალება არ აქვს საფრთხე. დამთავრდა ის დრო, როდესაც ტელევიზიებში ხელკეტებით, ნიღბებით უვარდებოდნენ; დამთავრდა ის დრო, როდესაც საქართველოში ტელევიზიების დახურვა მიდიოდა. არც ერთ მედიასაშუალებას და არც „რუსთავი 2"-ს არანაირი საფრთხე არ ემუქრება საქართველოში ჩვენი მთავრობის პირობებში.... თუ არის რაიმე ხარვეზი, რა თქმა უნდა, ეს აუცილებლად უნდა გამოსწორდეს. კიდევ ბევრი უნდა გავაკეთოთ იმისთვის, რომ წინ წავიდეთ. უბრალოდ ის, რომ მედია არის ტერორის ქვეშ, ეს არის ძალიან დიდი სიცრუე და ტყუილი", - განაცხადა „რუსთავი 2"-თან საუბრისას კალაძემ, რომელიც ფიქრობს, რომ ევროპარლამენტართა ნაწილის განცხადებები, თითქოს მთავრობა ზეწოლას ახორციელებს მედიაზე, არის არასწორი.

მისივე აზრით, ევროპარლამენტარები, შესაძლოა, მხოლოდ „ნაციონალური მოძრაობის" მიერ მიწოდებულ ინფორმაციებს ეყრდნობოდნენ.