თბილისში, პარლამენტის შენობის წინ „რუსთავი 2"-ის მხარდამჭერი აქცია-კონცერტი მიმდინარეობს. აქციაზე შეკრებილებს სიტყვით „რუსთავი 2"-ის გენერალური დირექტორის მოადგილემ, ზაალ უდუმაშვილმა მიმართა.

უდუმაშვილმა ტელეკომპანიის მხარდამჭერებს, სამოქალაქო სექტორს, პოლიტიკურ პარტიებსა და მოქალაქეებს მხარდაჭერისთვის მადლობა გადაუხადა.

„ისტორიულ გამარჯვებას მივაღწიეთ სტრასბურგის სასამართლოში, საბოლოო გამარჯვება იქნება მაშინ, როდესაც ამ ქვეყანაში ვერავინ ვეღარ შეძლებს სიტყვის თავისუფლებაზე ხელის აღმართვას.... ერთმა მალტელმა მოსამართლემ ბიძინა ივანიშვილს ხელიდან გამოგლიჯა „რუსთავი 2". ხუთი დღის შემდეგ კი, 7-მა მოსამართლემ ერთხმად დაადასტურა, რომ საქართველოში სიტყვის თავისუფლება საფრთხეშია. და თუ დღეს ვინმეს კითხვა უჩნდება - რატომ ევროპა? - აი, ამიტომ ევროპა, ხალხო, იმიტომ, რომ ადამიანის უფლებები ყველაზე მაღლა დგას. ამიტომ ვირჩევთ ჩვენ ევროპას. საქართველოს ხელისუფლება იმდენი ხანი არწმუნებდა მოსახლეობას რომ „რუსთავი 2"-ის საქმე ორ კერძო სუბიექტს დავაა, სანამ სტრასბურგის სასამართლომ არ განმარტა, ვინ არის ეს ორი კერძო სუბიექტი - ეს არის საქართველოს მოსახლეობა, რომელიც თავისუფალი სიტყვისთვის იბრძვის და მეორე სუბიექტი ეს არის საქართველოს ხელისუფლება - ეს არის რეალურად ის ორი კერძო სუბიექტი", - განაცხადა ზაალ უდუმაშვილმა.