ბათუმში მომხდარ არეულობასთან დაკავშირებით „ერთიანი ნაციონალური მოძრაობის“ ერთ-ერთი ლიდერი, პარტიის პოლიტიკური საბჭოს წევრი გიორგი ბარამიძე კომენტარს აკეთებს. ბარამიძემ „რუსთავი2“-თან საუბრისას თქვა, რომ საქართველოს პრემიერ მინისტრის „განცხადებაში მინიშნებები“ „ნაციონალურ მოძრაობასთან“ დაკავშირებით, „არის აბსოლუტურად უსაფუძვლო და დიდი, მორიგი უნამუსობა“.

„პრემიერ მინისტრის გაკეთებულ განცხადებაში მინიშნებები „ნაციონალურ მოძრაობასთან“ დაკავშირებით, იმ აბსოლუტურ უმსგავსობასთან და ვანდალიზმთან მიმართებაში, არის აბსოლუტურად უსაფუძვლო და დიდი, მორიგი უნამუსობა, როდესაც იგი ცდილობს ჩვენს მიერ სოლიდარობაგამოცხადებული, მშვიდობიანი აქცია მერე გააიგივოს მათ მიერვე მოგზავნილი პროვოკატორების მიერ ბათუმში მანქანების - პოლიციის იქნება ეს, თუ კერძო პირების - დაწვის და აი, ამ ბარბაროსულ ქმედებასთან, რომელიც, რა თქმა უნდა, გამოსაძიებელია და ყველა ამაში მონაწილე ადამიანი, ვინც არ უნდა იყოს იგი, არის კანონის მთელი სიმკაცრით დასასჯელი, მაგრამ ეს არ ნიშნავს, რომ მათ მოეხსნათ პასუხისმგებლობა იმისათვის, რა განუკითხაობაც სუფევს აჭარაში“, განაცხადა გიორგი ბარამიძემ.