„დემოკრატიული მოძრაობის“ თავმჯდომარემ ნინო ბურჯანაძემ პრეზიდენტის არჩევნის წესთან დაკავშირებით საკონსტიტუციო კომისიის ინიციატივაზე კომეტირებისას თქვა, რომ „ჩვენ ყოველდღიურად ვკარგავთ სახელმწიფოებრიობის ნიშნებს“.

„დიდი გულისტკივილით მინდა აღვნიშნო, რომ ასეთი სამარცხვინო ვითარება არც ერთ პოსტ-საბჭოთა ქვეყანაში არ არის. საუბარი აღარ მაქვს განვითარებულ დასავლურ ქვეყნებზე, რომლებსაც ვედრებით“, განაცხადა ნინო ბურჯანაძემ და დაამატა, რომ „არც ერთ ამ სახელმწიფოში ოლიგარქის არაფორმალური მმართველობა არ არის, ჩვენთან კი ფაქტია, რომ ბიძინა ივანიშვილმა იყიდა და ჯიბეში ჩაისვა მთელი ქვეყანა. ახლა კი პრეზიდენტის ინსტიტუტის დაქვემდებარებაც გადაუწყვეტია“.

ნინო ბურჯანაძის განცხადებით, პრეზიდენტის არაპირდაპირი არჩევა იქნება ძალიან დიდი უკან გადადგმული ნაბიჯი, რომლის უმძიმეს შედეგს ქვეყანა ძალიან მალე მოიმკის.

„დემოკრატიული მოძრაობა - ერთიანი საქართველოს“ ლიდერი ასევე წინააღმდეგია ქვეყნის საპარალამენტო რესპუბლიკად გარდაქმნის და ამბობს, რომ ეს უმძიმესი შედეგის მომტანი იქნება საქართველოსთვის.

„საპარლამენტო რესპუბლიკები წარმატებულად მოქმედებს იმ ქვეყნებში, სადაც არის ძალიან დიდი დემოკრატიული ტრადიციები, სადაც პოლიტიკური პარტიები არ წარმოადგენენ ხელისუფლების სატელიტებს, სადაც ერთი პარტიიდან მეორეში კალიასავით ხტომა მიუღებელია და სადაც კონკრეტული თანხის სანაცვლოდ არ იყიდება საპარლამენტო მანდატები,“ აღნიშნა ბურჯანაძემ.

მისი თქმით, საპარლამენტო რესპუბლიკას სჭირდება ძლიერი დემოკრატიული ინსტიტუტები. საქართველოში კი მთავრობა, პარლამენტი, სასამართლო, პროკურატურა ექვემდებარება კონკრეტულ ადამიანს. მედიასაც კი ძალიან დიდი პრობლემები აქვს, რადგან აშკარად არის მცდელობა მისი გაკონტროლების. ამ პირობებში კი, მიიჩნევს ნინო ბურჯანაძე, პრეზიდენტის ინსტიტუტის დაქვემდებარებაც ერთი ადამიანის გავლენის სფეროში, უმძიმესი შედეგის მომტანი იქნება საქართველოსთვის.