ამერიკის შეერთებულმა შტატებმა და დიდმა ბრიტანეთმა ახლო აღმოსავლეთის და ჩრდილოეთ აფრიკის ზოგიერთი ქვეყნიდან შემომავალ ფრენებზე თვითმფრინავის ბორტზე პორტატული კომპიუტერების (ლეპტოპების) ატანის აკრძალვის გადაწყვეტილება მიიღო.

აშშ-ის გადაწყვეტილება ელექტრონული მოწყობილობების აკრძალვის თაობაზე უფრო ფართოა და ბრიტანული „გარდიანის“ ცნობით, თვითმფრინავის ბორტზე ნებისმიერი იმ ელექტრონული მოწყობილობის ატანას კრძალავს, რომელიც მობილურ ტელეფონზე უფრო დიდი ზომისაა. აღნიშნულის მიზეზად ანტიტერორისტული გამაფრთხილებელი ღონისძიებების გატარება სახელდება.

BBC-ის ცნობით, აკრძალვა შეეხება 10 აეროპორტიდან 9 ავიახაზების საზღვარგარეთიდან შემომავალ ფრენებს. ტელეფონების ატანა კი კვლავ ნებადართული იქნება.

ბრიტანული აკრძალვა, რომელიც ამერიკის მიერ გადაწყვეტილების მიღებიდან რამდენიმე საათში გამოცხადდა, ამერიკულის მსგავსია, მაგრამ სხვა ავიახაზებს ეხება.

დაუნინგ სტრიტმა განაცხადა, რომ 14 ავიაგადამზიდავზე, რომლებიც პირდაპირ ფრენებს ასრულებენ თურქეთიდან, ლიბანიდან, იორდანიიდან, ეგვიპტიდან, ტუნისიდან და საუდის არაბეთიდან, მგზავრებს არ ექნებათ თვითმფრინავის ბორტზე ხელის ბარგთან ერთად ლეპტოპების ატანის შესაძლებლობა.

თურქეთის მთავრობამ განაცხადა, რომ შეერთებული შტატების აკრძალვა არამართებულია და ის უნდა გაუქმდეს.

ბრიტანული აკრძალვის მიხედვით, ელექტრონული მოწყობილობების დიდი ნაწილის ატანა თვითმფრინავზე, როგორც ხელისბარგის შემოწმების ნაწილი, კვლავ დასაშვები იქნება.

კანადის ტრანსპორტის მინისტრმა მარკ გარნეუმ აღნიშნა, რომ მისი ქვეყანა ჯერ კიდევ ფიქრობს თვითმფრინავების ბორტზე ელექტრონული მოწყობილობების ატანის შეზღუდვის შესახებ.

რომელ ფრენებზე ვრცელდება აკრძალვა?

იმ ავიახაზებს შორის, რომელზეც დიდმა ბრიტანეთმა აკრძალვა დააწესა არიან British Airways-ი და EasyJet-ი.

9 ავიახაზები, რომელსაც შეერთებული შტატების აკრძალვა შეეხოთ არიან:

Royal Jordanian,

EgyptAir,

Turkish Airlines,

Saudi Arabian Airlines,

Kuwait Airways,

Royal Air Maroc,

Qatar Airways,

Emirates,

Etihad Airways.

ეს კი იმ 10 საერთაშორისო აეროპორტის ჩამონათვალია, რომელზეც აკრძალვა ვრცელდება:

1. მუჰამედ V-ის საერთაშორისო, კასაბლანკა, მაროკო Mohammed V International, Casablanca, Morocco

2. ათათურქის აეროპორტი, სტამბული, თურქეთი - Ataturk Airport, Istanbul, Turkey

3. ქაიროს საერთაშორისო აეროპორტი, ეგვიპტე Cairo International Airport, Egypt

4. დედოფალ ალიას საერთაშორისო, ამანი, იორდანია Queen Alia International, Amman, Jordan

5. მეფე აბდულაზიზის საერთაშორისო, ჯედაჰი, საუდის არაბეთი King Abdulaziz International, Jeddah, Saudi Arabia

6. მეფე ხალიდის საერთაშორისო, ერ-რიადი, საუდის არაბეთი King Khalid International, Riyadh, Saudi Arabia

7. ქუვეითის საერთაშორისო აეროპორტი Kuwait International Airport

8. ჰამადის საერთაშორისო, დოჰა, ყატარი Hamad International, Doha, Qatar

9. აბუ დაბის საერთაშორისო, არაბთა გაერთიანებული საამიროები Abu Dhabi International, United Arab Emirates

10. დუბაის საერთაშორისო, არაბთა გაერთიანებული საამიროები Dubai International, United Arab Emirates

იმ ავიახაზებს, რომლებზეც შეერთებულმა შტატებმა გადაწყვეტილება მიიღო, აკრძალვის ასამოქმედებელ ბოლო ვადად შაბათი 07:00 GMT დაუწესა. რაც შეეხება შეზღუდვების დასრულების თარიღს, ასეთი რამ მითითებული არ არის.

BBC წერს, რომ ახლო აღმოსავლეთის და ჩრდილოეთ აფრიკის თითქმის ყველა იმ ქვეყანას, რომლის აეროპორტებსაც აკრძალვა შეეხო, ვაშინგტონთან ახლო, მეგობრული ურთიერთობები აქვთ, ასე რომ ეს გადაწყვეტილება ზოგიერთი ამ სახელმწიფოს მხრიდან მიჩნეული იქნება, როგორც მკაცრი და არაპოპულარული ღონისძიება. მაგალითისთვის, ყურის მდიდარ არაბ ბიზნეს ლიდერებს, რომლებიც შეერთებულ შტატებში მიემგზავრებიან, ფრენებისას უკვე აღარ ექნებათ თავიანთ ლეპტოპებში მუშაობის შესაძლებლობა.

მაგრამ, როგორც BBC წერს, ავიაციის ექსპერტები სომალიში გასული წლის ინციდენტმა შეაშფოთა, როდესაც ალ-შაბააბის მეამბოხეთა ჯგუფმა კონტრაბანდული გზით მოახერხა მოგადიშუს აეროპორტში თვითმფრინავზე ლეპტოპის ატანა, რომელზეც ასაფეთქებელი მოწყობილობა იყო დამონტაჟებული და რომლითაც თვითმფრინავის ერთი ნაწილი ააფეთქეს, მაგრამ ავიალაინერი ჯერ კიდევ დაბალ სიმაღლეზე იმყოფებოდა და მფრინავმა უსაფრთხო დაშვება მოახერხა.