ლონდონში მომხდარი თავდასხმებისას, რასაც დიდი ბრიტანეთის პოლიციამ „ტერორისტული ინციდენტი“ უწოდა, მოკლულია 4, ერთ-ერთი მათგანი პოლიციელი, და დაზიანებები აქვს მიღებული 40 ადამიანს, მათ შორის 3 პოლიციელს. აღნიშნულ ინფორმაციას BBC ავრცელებს.

თავდამსხმელმა ცენტრალურ ლონდონში, თავდაპირველად Hyundai-ს 4x4 -ზე ავტომანქანით ვესტმინისტერის ხიდზე ფეხით მოსიარულეებს გადაუარა, შემდეგ პარლამენტის შენობასთან უიარაღო პოლიციის ოფიცერი, 48 წლის ქეით პალმერი დანით სასიკვდილოდ დაჭრა, სანამ პოლიცია მის ადგილზე ლიკვიდაციას მოახდენდა. 

BBC-ის ცნობით, თემთა პალატის ლიდერმა, დევიდ ლიდინგტონმა პარლამენტის წევრებს უთხრა, რომ „თავდამსხმელი შეიარაღებული პოლიციის მიერ ცეცხლსასროლი იარაღით იქნა მოკლული“.

თავდამსხმელის ვინაობა ჯერჯერობით არ სახელდება. ლონდონის პოლიციის მოქმედმა ვიცე-კომისარმა და კონტრტერორიზმის ხელმძღვანელმა მარკ როულიმ თქვა, რომ მათ იციან ვინ არის ის მამაკაცი და რომ იგი შთაგონებული იყო საერთაშორისო და ისლამისტებთან დაკავშირებული ტერორიზმით, მაგრამ სხვა დეტალები არ გაუმჟღავნებია. 

(თავდასხმაში ეჭვმიტანილ მამაკაცს სამედიცინო დახმარებას უწევენ. ფოტოზე ძირს დაგდებული 2 დანა ჩანს - PA)

პარლამენტარებმა განაცხადეს, რომ მათ ცეცხლსასროლი იარაღიდან სამი-ოთხი გასროლის ხმა გაიგეს. დაუნინგ სტრიტის წყაროს განცხადებით, პრემიერ მინისტრი ტერეზა მეი „კარგად“ არის.

ტერეზა მეი ინციდენტის დროს ვერცხლისფერ „იაგუარში“ ჩასვეს და მიმდებარე ტერიტორიიდან გაიყვანეს.

ცოტა ხნის წინათ მეის ტელეფონით ესაუბრა აშშ-ის პრეზიდენტი დონალდ ტრამპი. ბრიტანეთისადმი სოლიდარობა გამოხატეს გერმანიის კანცლერმა, ანგელა მერკელმა და საფრანგეთის პრეზიდენტმა, ფრანსუა ოლანდმა. 

ცოტა ხანში დიდ ბრიტანეთში პრემიერ მინისტრის, ტერეზა მეის თავმჯდომარეობით დაუნინგ სტრიტზე საგანგებო კომიტეტის, ე.წ. COBRA-ს შეხვედრა დაიწყება.

გთავაზობთ ლონდონში მომხდარი ინციდენტის შესახებ სააგენტო Reuters-ის მიერ გავრცელებულ ფოტოებს.