ყოფილი პრემიერ-მინისტრის, “საზოგადოება 2030″-ის დამფუძნებლის, ბიძინა ივანიშვილის განცხადებით, 5 ათასი ლარი არის ის მინიმუმი, რითაც შეიძლება დღეს საქართველოში კარგი მინისტრი დაიქირავო. ივანიშვილი “ფეისბუქზე” მოქალაქეების მიერ გამოქვეყნებულ კომენტარებს, რომ 5 ათასი ლარი დიდი თანხაა, მაშინ, როცა პენსიები დაბალია, არ ეთანხმება. ამის შესახებ ბიძინა ივანიშვილმა გადაცემა “კვირის 2030″-ში განაცხადა.

 
ექს-პრემიერმა მთავრობის წევრების ხელფასებსა და პრემიებზე ისაუბრა და აღნიშნა, რომ “ამ მხრივ მთავრობამ მოახერხა რაღაც კონდინციამდე მისვლა”. “თუმცა ეს კონტროლი უნდა გაგრძელდეს და თვალი არ უნდა მოვხუჭოთ. ესაა ჩვენი, საზოგადოების როლი, რომ კონტროლის მექანიზმი არ უნდა მოსუსტდეს. მაგრამ არც აქ უნდა გადავაჭარბოით. 5 ათას ლარზე დაიყვანეს მინისტრების ხელფასები, პრემიების რაოდენობა მახსოვს ჩემს დროსაც. 5 ათასი ლარი არის ის მინიმუმი, რითაც შეიძლება დღეს საქართველოში კარგი სპეციალისტი დაიქირავო, მხედველობაში მაქვს მინისტრი. ჩვენ გვინდა დარგები განვითარდეს, შედეგები მივიღოთ და აუცილებლად ვსაჭიროებთ კვალიფიციურ სპეციალისტებს, ამ დროს გადახდაზეც უნდა შევთანხმდეთ, ის, რაც აუცილებელია და სავალდებულოა, კარგ სპეციალისტს უნდა გადაეხადოს.

 
“ფეისბუქში” წამიკითხავს, რომ 5 ათასი ლარი რა ამბავია, პენსია როდესაც ამდენია. მე კარგად მესმის, რომ პენსია დაბალია და საზოგადოება არის ძალიან ღარიბი, მაგრამ თუ გვინდა ამას თავი დავაღწიოთ, პროფესიონალებს უნდა გადავუხადოთ. ამით მომავალში პენსიებიც გაიზრდება და ეფექტურობაც ამაღლდება”, -განაცხადა ივანიშვილმა.