ხონის მუნიციპალიტეტში, ნახახულევის ადმინისტრაციული ერთეულის სოფელ ახალბედისეულში საინიციატივი ჯგუფის მიერ ( 2017 წლის 24 თებერვალს გამგებლის ბრძანების საფუძველზე დარეგისტრირდა) სოფლის საერთო კრება მოიწვიეს.

შეხვედრას გამგებლის პირველი მოადგილე იუზა უგულავა, საკრებულოს თავმჯდომარის მოადგილე კობა კუბლაშვილი, ადმინისტრაციული სამსახურის უფროსი ამირან კინწურაშვილი, გამგებლის წარმომადგენელი ნახახულევის ადმინისტრაციულ ერთეულში შალვა ძაგნიძე და სხვა მოწვეული პირები ესწრებოდნენ. 

ხონის გამგეობის ცნობით, დღის წესრიგი სამი საკითხით განისაზღვრა: 1. სოფლის საერთო კრებაზე რჩეულის არჩევა; 2. სოფლის მოსახლეობის სასმელი წყლით მომარაგების პროექტის/სოფლის მცხოვრებთა მოაზრებების/სოფლის მცხოვრებთა შემოთავაზებების განხილვა. 3. სოფელში არსებული სასმელი წყლის მილების აღდგენის პროექტის/სოფლის მცხოვრებთა მოსაზრებების/სოფლის მცხოვრებთა შეთავაზების განხილვა.

გამგეობის ინფორმაციით, სოფელმა რჩეული ნინო ხაბულიანი ერთხმად აირჩია. მოგვიანებით, იმსჯელეს სოფლის უთავრეს პრობლემაზე - მოსახლეობა სასმელი წყლის სისტემის მოწესრიგებას ითხოვს. კრებაზე გამოითქვა მოსაზრებები სასმელი წყლის სისტემის დაპროექტების შესახებ, იმსჯელეს პრობლემის მოგვარების გზებსა და ადგილობრივი ხელისუფლების წარმომადგენლებს საკითხით დაინტერესება სთხოვეს.

,,ვიცით, რომ ეს პრობლემა არსებობს. რა თქმა უნდა, სასმელი წყალი, რომელიც თითოეულისათვის სასიცოცხლოდ აუცილებელია ფუფუნების საგანს არ წარმოადგენს და ეს ჩვენთვისაც პრიორიტეტული საკითხია. მოგეხსენებათ, მცირებიუჯეტიანი მუნიციპალიტეტი ვართ და ერთბაშად ყველა პრობლემის მოგვარება წარმოუდგენელია. მიმდინარე წელს დავიწყებთ პროექტზე მუშაობას. რაც შეეხება ფორმატს, შეკრებას და მსჯელობას თემის აქტუალურ საკითხებზე მხოლოდ და მხოლოდ მივესალმები და ყოველთვის მზად ვართ ჩავერთოთ, მოვისმინოთ და გავიზიაროთ ჩვენი მოქალაქეების მოსაზრებები, წინადადებები, რაც გადაწყვეტილების მიღების პროცესში ძალიან გვეხმარება", განაცხადა იუზა უგულავამ.