სანკტ-პეტერბურგის მეტროში 11 ადამიანის მკვლელობაში ეჭვმიტანილად 25 წლამდე ასაკის მამაკაცი სახელდება, რომელიც ცენტრალური აზიიდან, ყირგიზეთიდანაა და რომელსაც რუსეთის მოქალაქეობა ჰქონდა მიღებული. ინფორმაციას BBC რუსულ მედიაზე დაყრდნობით ავრცელებს.

ორშაბათს, შუადღისას ორ მეტროსადგურს შორის მომხდარი აფეთქებისას დაიღუპა 11 ადამიანი და სულ მცირე 45-მა მგზავრმა მიიღო დაზიანებები.

ახალი ამბების სააგენტოები, „ინტერფაქსი“ და „ტასი“ აცხადებენ, რომ ეჭვმიტანილი იდენტიფიცირებულია, მაგრამ ურთიერთგამომრიცხავი ინფორმაციები ვრცელდება იმის თაობაზე, იყო თუ არა იგი თვითმკვლელი ტერორისტი.

სანკტ-პეტერბურგის ხელისუფლებამ სამდღიანი გლოვა გამოაცხადა.

ვლადიმერ პუტინი, რომელიც აფეთქებისას ქალაქში იმყოფებოდა, ორშაბათ საღამოს შემთხვევის ადგილას მივიდა და დროებით სალოცავთან ყვავილები მიიტანა.

რუსეთის გამომძიებლებმა ინციდენტი აღწერეს, როგორც „ტერორისტული აქტი“, მაგრამ ძალიან მცირე დეტალები გაამჟღავნეს. მომხდარზე არც ერთ დაჯგუფებას არ აუღია პასუხისმგებლობა.

პრემიერ მინისტრმა დიმიტრი მედვედევმა Facebook-ზე გამოქვეყნებულ განცხადებაში თქვა, რომ აფეთქება „ტერორისტული თავდასხმა“ იყო.

თავდაპირველად გავრცელებული ინფორმაციების მიხედვით სანკტ-პეტერბურგის მეტროში ორ აფეთქებას ჰქონდა ადგილი - ერთი აფეთქება „სენაია პლოშჩადის“, მეორე კი „ტეგნოლოგიჩესკი ინსტიტუტის“ სადგურზე იყო მომხდარი, მაგრამ მოგვიანებით რუსეთის ეროვნულმა ანტი-ტერორისტულმა კომიტეტმა განაცხადა, რომ ორ სადგურს შორის მხოლოდ ერთ აფეთქებას ჰქონდა ადგილი , რომელიც ადგილობრივი დროით დაახლოებით 14:30 საათზე მოხდა.