სირიის საგარეო საქმეთა მინისტრმა წარადგინა პირობები გაერო-ს ნებისმიერი გამოძიებისთვის, რომელიც ქიმიური ნივთიერებით ათეულობით ადამიანის მკვლელობას უკავშირდება.

ვალიდ მუალემმა BBC-ს უთხრა, რომ ეს გამოძიება უნდა იყოს არაპოლიტიკური, მასში ჩართული უნდა იყოს „მრავალი ქვეყანა“ და „დაიწყოს დამასკოდან“. მან უარყო ინფორმაცია იმის შესახებ, რომ ქიმიური იარაღი ჰაერიდან სირიამ ჩამოაგდო.

გაერო-ს ბავშვთა სააგენტომ დაადასტურა, რომ სულ მცირე 27 ბავშვი იქნა მოკლული.

დიდ ბრიტანეთში ბაზირებულმა ჯგუფმა, ადამიანის უფლებების სირიულმა სადამკვირვებლო ორგანიზაციამ უფრო ადრე გაავრცელა ინფორმაცია, რომ იდლიბის პროვინციაში, ხან შეიხუნში ქიმიური ინციდენტისას 86 ადამიანი გარდაიცვალა.

რუსეთს, სირიის პრეზიდენტის ბაშარ ალ-ასადის მცირერიცხოვან მოკავშირეთა შორის ერთ-ერთს, გაერო-ს უშიშროების საბჭოზე, ოთხშაბათს, შეერთებული შტატები და დიდი ბრიტანეთი შეეკამათა, როცა ის ცდილობდა დაემტკიცებინა, რომ მასობრივი მოწამვლა ამბოხებულების კუთვნილი ქიმიური იარიღით იყო გამოწვეული.

ვაშინგტონმა ნართაულად გადაჰკრა სიტყვა, რომ აღნიშნული ინციდენტის შემდეგ მან შესაძლოა შეცვალოს მისი პოლიტიკა სირიის მიმართ.

BBC მოწმეებსა და აქტივისტებზე დაყრდნობით წერს, რომ ქალაქ იდლიბის სამხრეთით დაახლოებით 50 კილომეტრში მდებარე ხან შეიხუნზე თავდასხმა სამხედრო თვითმფრინავებით სამშაბათს გამთენიისას განხორციელდა, როდესაც ბევრ ადამიანს ეძინა.

Unicef-ის თანახმად, სულ მცირე 27 ბავშვი იქნა მოკლული და 546-მა ადამიანმა, რომელთა შორის ბევრი ბავშვია, დაზიანებები მიიღო.