პარლამენტი დღეს პრეზიდენტის ყოველწლიურ ანგარიშს მოისმენს. საკანონმდებლო ორგანოში პლენარულ სხდომაზე პრემიერ მინისტრს, მინისტრებს, უმაღლესი სახელმწიფო ინსტიტუციების ხელმძღვანელ პირებს, დიპლომატიური კორპუსის წარმომადგენლებს ელოდებიან.

პრეზიდენტის მოხსენების შემდეგ, რომელიც 12:00 საათზე დაიწყება, 2-საათიანი შესვენება გამოცხადდება, რის შემდეგაც დებატების ფორმატში, დეპუტატების გამოსვლები გაიმართება.

პარლამენტის ბიუროს 3 აპრილის სხდომაზე მიღებული გადაწყვეტილებით, პარლამენტის წევრებისათვის, რომლებიც არც ერთ ფრაქციაში არ არიან გაერთიანებული, გათვალისწინებულია 5-5 წუთი. ამის შემდეგ პარლამენტის ტრიბუნა უმრავლესობისა და უმცირესობის გარეთ არსებულ ფრაქციებს (”ნაციონალური მოძრაობა” და ”საქართველოს პატრიოტები”) დაეთმობა - მათთვის გათვალისწინებულია 15-15 წუთი. საპარლამენტო უმცირესობაში შემავალი ფრაქციებისთვის, ისევე როგორც უმრავლესობაში შემავალი ფრაქციებისთვის გათვალისწინებულია 10-10 წუთი. ამის შემდეგ უმცირესობას და უმრავლესობას ცალ-ცალკე 45-45 წუთი დაეთმობა, ხოლო შემდეგ გამოვლენ ვიცე-სპიკერები 10-10 წუთით. ბოლოს, ტრიბუნას პარლამენტის თავმჯდომარე დაიკავებს, რომლის გამოსვლისთვის გათვალისწინებულია 15 წუთი.

პრეზიდენტის მრჩევლის, ფიქრია ჩიხრაძის განცხადებით, გიორგი მარგველაშვილი თავის მოხსენებაში ქვეყანაში არსებულ ყველა გამოწვევაზე ისაუბრებს.

ამის შესახებ ჩიხრაძემ „რუსთავი 2"-ს განუცხადა.

ფიქრია ჩიხრაძის თქმით, კონკრეტულ პრობლემებზე საუბრის გარდა, ქვეყნის მეთაური მთავრობასა და პარლამენტს საკუთარ რეკომენდაციებსაც გააცნობს.

„გარდა პრობლემების აღწერისა და ამ პრობლემებზე საუბრისა, არის კონკრეტული შეთავაზებები, რაც ასევე ძალიან მნიშვნელოვნად მიგვაჩნია. პარლამენტის უნდა იყოს ძალიან გახსნილი ორგანო, პრეზიდენტის გამოსვლა არის ის შემთხვევა, როდესაც ამის შესაძლებლობა ჩნდება,“ განაცხადა ფიქრია ჩიხრაძემ.