ე.წ. სამხრეთ ოსეთის საპრეზიდენტო კანდიდატმა, პარლამენტის სპიკერმა ანატოლი ბიბილოვმა განაცხადა, რომ „სამხრეთ ოსეთის“ საპრეზიდენტო არჩევნებში გაიმარჯვა.

„ჩვენ შევაგროვეთ ყველა ოქმის ასლები, რომელზეც პრეზიდენტის ყველა კანდიდატის ხელმოწერაა დაფიქსირებული. ამ ოქმების ასლების დამუშავების და დათვლის შედეგად მე ხმების 54,9 პროცენტი მივიღე. ასე რომ, თავს გამარჯვებულად ვთვლი“, უთხრა ბიბილოვმა „РИА Новости“-ს.

ამ დროისთვის, ოფიციალურად ოქმების 35% -ია დათვლილი, რომლის მიხედვითაც ბიბილოვს 48,7%, ე.წ. პრეზიდენტ ლეონიდ თიბილოვს 26.5%, მე-3 კანდიდატს, КГБ-ს თანამშრომელს, ალან გაგლოევს კი 19,1% აქვს მიღებული.

ე.წ. სამხრეთ ოსეთში საპრეზიდენტო არჩევნები კვირას, 9 აპრილს გაიმართა. კანდიდატს გამარჯვებისთვის 50%-ზე მეტი ხმის მიღება ესაჭიროება.