საქართველოს ტერიტორიული მთლიანობისათვის წარმოებულ ბრძოლებსა და სხვადასხვა სამშვიდობო მისიებში დაჭრილი და დაშავებული სამხედრო მოსამსახურეებით დაკომპლექტებული მჯდომარე ფრენბურთის გუნდი კანადაში დაგეგმილ „ძლიერთა თამაშებში“ მონაწილეობის მისაღებად ემზადება.

თავდაცვის სამინისტროს მიერ გავრცელებული ინფორმაციის თანახმად, დიდი ბრიტანეთის საელჩოს მხარდაჭერით, ქართველ პარაოლიმპიელებს საერთაშორისო ტურნირისთვის გაერთიანებული სამეფოს თავდაცვის სამინისტროს მწვრთნელი რიჩარდ ოსბორნი წვრთნის. ის საქართველოში მეორედ იმყოფება და საერთაშორისო ტურნირზე თავდაცვის გუნდის მთავარი მწვრთნელის მრჩეველ-ასისტენტი იქნება.

ვარჯიშებს დიდი ბრიტანეთის თავდაცვის ატაშე, ვიცე-პოლკოვნიკი დეივ ეთელი, მისი თანაშემწე, ავიაციის სერჟანტი ტრეისი პალმერი და აშშ-ის თავდაცვის დეპარტამენტიდან საქართველოს თავდაცვის სამინისტროში მრჩეველი სამედიცინო კუთხით ფრენკ ბენისტერი დაესწრნენ.

უწყების ცნობით, დაჭრილი და დაშავებული სამხედრო მოსამსახურეებით დაკომპლექტებული 10-კაციანი მჯდომარე ფრენბურთის გუნდი მონაწილეობას სექტემბერში, კანადაში „ძლიერთა თამაშებში“ („INVICTUS GAMES 2017“) მიიღებს. ასპარეზობის მიზანი დაჭრილი სამხედრო მოსამსახურეების საბრძოლო სულისკვეთების ამაღლება და მოტივაციის გაზრდა, ასევე მათი რეაბილიტაციის პროცესში სპორტის აქტიურად გამოყენებაა. „ძლიერთა თამაშებში“ ქართველი პარაოლიმპიელები 2014 წლიდან მონაწილეობენ. გასულ წელს აშშ-ში ჩატარებულ „ძლიერთა თამაშების“ შეჯიბრში თავდაცვის სამინისტროს მჯდომარე ფრენბურთის გუნდმა მესამე ადგილი დაიკავა.