ავღანეთში ეროვნული გლოვა გამოცხადდა მას შემდეგ, რაც „თალიბანის“ მიერ სამხედრო ბაზაზე თავდასხმის შედეგად 100-ზე მეტი ჯარისკაცი იქნა მოკლული თუ დაჭრილი.

BBC-ის ცნობით, პრეზიდენტმა აშრაფ ღანიმ განაცხადა, რომ ქალაქ მაზარ-ი- შარიფის სიახლოვეს განხორციელებული თავდასხმა კაცობრიობის ყველა ღირებულების და ისლამური სწავლებების საწინააღმდეგოა.

არმიის განცხადებით, ამბოხებულების სამიზნე ბაზაზე მდებარე მეჩეთში მყოფი ის მლოცველები იყვნენ, რომლებიც პარასკევის ლოცვის შემდეგ სამლოცველოს ტოვებდნენ და ასევე ისინი, ვინც სასადილოში იმყოფებოდნენ.

(პრეზიდენტმა ღანიმ დაჭრილი ჯარისკაცები მოინახულა)

ზოგიერთი გადარჩენილი ამტკიცებს, რომ თავდამსხმელებს დახმარებას შიგნიდან უწევდნენ.

ერთ-ერთმა დაჭრილმა ჯარისკაცმა განაცხადა: „როდესაც თავდამსხმელები ბაზაზე შემოდიოდნენ, რატომ არ გაუწიეს მათ წინააღმდეგობა? იქ მხოლოდ ერთი ბარიერი და უსაფრთხოების ჭიშკარი არაა, ასეთი შვიდი თუ რვაა“.

როგორც BBC წერს, „თალიბანმა“ განცხადებაში თქვა, რომ მან ერთ-ერთი ყველაზე მომაკვდინებელი თავდასხმა განახორციელა სამხედრო ბაზაზე ქვეყანაში, რომელიც ამბოხებულების არაერთი თავდასხმის სამიზნე გამხდარა.

არმიის განცხადებით, მებრძოლებმა, რომლებიც ავღანურ სამხედრო უნიფორმებში იყვნენ გამოწყობილნი და სამხედრო სატრანსპორტო საშუალებებით გადაადგილდებოდნენ, საჯარისო შენაერთში შევიდნენ, სანამ ცეცხლს გახსნიდნენ.

ბრძოლებისას „თალიბანის“ სულ მცირე 10 მებრძოლი მოკლეს და ერთი დაატყვევეს.

ავღანეთის თავდაცვის სამინისტროს, პარასკევს მომხდარი თავდასხმის შედეგად დაღუპულთა ზუსტი რაოდენობა არ დაუსახელებია და მხოლოდ ის განაცხადა, რომ 100-ზე მეტი ჯარისკაცია მოკლული თუ დაჭრილი, მაგრამ სხვა ოფიციალური პირები, რომლებიც ანონიმურად საუბრობდნენ, აცხადებენ, რომ გარდაცვლილთა რიცხვი სულ მცირე 140-ს შეადგენს.