საქართველოს კათოლიკოს-პატრიარქმა, უწმინდესმა და უნეტარესმა ილია მეორემ მრევლს კვირაცხოვლობის დღესასწაული მიულოცა და ყოვლადწმინდა სამების საკათედრო ტაძარში ქადაგებისას ბრძანა, რომ კვირაცხოვლობა „არის უდიდესი დღესასწაული, თანასწორი აღდგომისა და დღევანდელ დღეს ეწოდება თომას კვირიაკე“.

„ეს არის ის დღე, როცა თომამ ეჭვი შეიტანა მაცხოვრის აღდგომაში, როცა ყველამ ნახა აღდგომილი მაცხოვარი და თომამ თქვა, თუ არ დავინახავ და არ შევეხები ჭრილობას ხელთა და ფეხთა და გვერდსა ზედა, არა ვიწამებ. გამოეცხადა თომას მაცხოვარი და თომა დავარდა მუხლებზე და თქვა, უფალი ჩემი და ღმერთი ჩემი... დიდება და მადლობა უფალს, რომ გვაძლევს ჩვენ იმედს ცხოვრებისა, იმედს მომავალი არსებობისა“, ბრძანა სრულიად საქართველოს კათოლიკოს-პატრიარქმა სამების საკათედრო ტაძარში, სადღესასწაულო ლიტურგიის დასრულების შემდეგ.