საფრანგეთის საპრეზიდენტო არჩევნების პირველ ტურში ცენტრისტი ემანუელ მაკრონი და ულტრა-მემარჯვენე მარინ ლე პენი გავიდნენ. 

როგორც BBC იუწყება, ხმების 96% დათვლილია და მაკრონმა 23.9%, ხოლო ლე პენმა 21.4% მიიღო. სწორედ ეს ორი კანდიდატი იბრძოლებს საფრანგეთის პრეზიდენტობისთვის 7 მაისს, მე-2 ტურში.

საფრანგეთში საპრეზიდენტო არჩევნები, 3 დღის წინათ პარიზში პოლიციაზე მომხდარი თავდასხმის გამო, უსაფრთხოების უმაღლესი ზომების პირობებში გაიმართა.

როგორც ბრიტანული სამაუწყებლო კორპორაცია (BBC) იტყობინებოდა, არჩევნების უსაფრთხო გარემოს უზრუნველსაყოფად მთელი საფრანგეთის მასშტაბით დაახლოებით 50 000 პოლიციელი და 7 000 ჯარისკაცი იყო განლაგებული.

საარჩევნო უბნები საფრანგეთში ადგილობრივი დროით დილის 08:00 საათზე გაიხსნა, ამავე დროს, საზღვარგარეთის ზოგიერთ ტერიტორიაზე ხმის მიცემა შაბათს დაიწყო. საარჩევნო უბნები 20:00 საათზე დაიხურა.

არჩევნებში ერთმანეთს მეტოქეობას 11 კანდიდატი უწევდა, თუმცა, როგორც BBC დილიდანვე იუწყებოდა, პრეზიდენტობის შანსი მათგან 4 კანდიდატს ჰქონდა - „კონსერვატორების“ წარმომადგენელ ფრანსუა ფიონს, ულტრა-მემარჯვენე მარინ ლე პენს, „ლიბერალ-ცენტრისტს“, ემანუელ მაკრონს და ულტრა-მემარცხენე ჯინ-ლუს მელენშონს.

საარჩევნო კამპანიის დროს ერთ-ერთი ყველაზე ცენტრალური თემა ეროვნული უსაფრთხოების საკითხი იყო.

BBC დილიდანვე წერდა, რომ სრული გამარჯვებისთვის საჭირო 50%-იანი მხარდაჭერის მოპოვების შანსი არც ერთ კანდიდატს არ ჰქონდა.