თიბისი გალერეაში ლადო გუდიაშვილის გრაფიკული ნამუშევრების გამოფენა გაიხსნა. კულტურის სამინისტროს ცნობით, მხატვრის გამოფენა ლადო გუდიაშვილის ფონდისა და თიბისი ბანკის ორგანიზებით ეწყობა.

კულტურისა და ძეგლთა დაცვის სამინისტროს ინფორმაციით, თიბისი გალერეაში სატირული გრაფიკის ციკლიდან 35 ნახატია წარმოდგენილი, დამთვალიერებელს მათი ნახვა 10 მაისამდე შეეძლება. მხატვრის ნამუშევრების მუდმივი ექსპოზიციის ნახვა შესაძლებელია „ლადო გუდიაშვილის საგამოფენო დარბაზში“, რომელიც მისივე სახელობის ქუჩაზე მდებარეობს.

„საგამოფენო დარბაზში წარმოდგენილია გუდიაშვილის გრაფიკული და ფერწერული ტილოები. ექსპოზიცია პერიოდულად იცვლება და ფართო აუდიტორიას შესაძლებლობა აქვს გაეცნოს ლადო გუდიაშვილის ცხოვრებასა და შემოქმედებას.

სატირულ გრაფიკას მნიშვნელოვანი ადგილი უჭირავს გუდიაშვილის შემოქმედებაში, მეოცე საუკუნის 40-50-იან წლებში მხატვარმა მრავალი ნახატი შექმნა ამ ჟანრში. ტონირებულ ქაღალდზე ტუშით შესრულებული ნამუშევრები მხატვრისთვის საკმაოდ რთულ პერიოდს ემთხვევა, როცა საბჭოთა რეჟიმი განსაკუთრებული სისასტიკით გამოირჩეოდა და მძიმე რეპრესიების ხანა იდგა. ლადო გუდიაშვილის გრაფიკული ნამუშევრები გამოხატავენ სწორედ მის პროტესტს, ერთდროულად, როგორც სტალინის ეპოქის, ისე ფაშიზმის წინააღმდეგ", აცხადებენ კულტურის სამინისტროში.