ამერიკის შეერთებული შტატების პრეზიდენტმა, დონალდ ტრამპმა, თეთრ სახლის ოვალურ ოფისში საქართველოს პრემიერ მინისტრთან შეხვედრის შემდეგ თვითერზე დაწერა: „მქონდა პატივი დღეს თეთრ სახლში მიმეღო საქართველოს პრემიერ მინისტრი გიორგი კვირიკაშვილი ვიცე-პრეზიდენტ მაიკ პენსთან ერთად“.

საქართველოს პრემიერ მინისტრი თეთრ სახლში ამერიკის შეერთებული შტატების პრეზიდენტს, დონალდ ტრამპს ვიცე-პრეზიდენტმა მაიკ პენსმა წარუდგინა, რომელსაც კვირიკაშვილი მანამდე შეხვდა.

საქართველოს პრემიერ მინისტრმა თეთრ სახლში გამართული შეხვედრების შემდეგ ჟურნალისტებთან კომენტარი გააკეთა. მან თქვა, რომ „ეს იყო ძალიან პოზიტიური შეხვედრა“, რომელზეც ქართულმა მხარემ ამერიკის შეერთებულ შტატებთან პარტნირობის გაღრმავების „ძალიან მყარი გარანტიები“ მიიღო.

„ჩვენ მივიღეთ ძალიან მყარი გარანტიები ამერიკის შეერთებულ შტატებთან პარტნიორობის გაღრმავების, ყველა მიმართულებით. ეს იყო ძალიან პოზიტიური შეხვედრა. გვქონდა საუბარი ყველა მიმართულებით ურთიერთობებზე - ეს არის თავდაცვის და უსაფრთხოების მიმართულება; ეს არის კულტურული ურთიერთობები; ეს არის დემოკრატიული ინსტიტუციების განვითარებაში მომავალი მხარდაჭერა ამერიკის შეერთებული შტატების; ეს არის ეკონომიკური ურთიერთობების გაღრმავება. ვფიქრობ, რომ ძალიან მნიშვნელოვანი შეხვედრა იყო, რომელიც გაგრძელდა შემდგომ პრეზიდენტთან შეხვედრით. პრეზიდენტის მხრიდან ასევე მივიღეთ ძალიან მკაფიო გზავნილები საქართველოს მიმართ მხარდაჭერის თაობაზე და ჩვენ ვფიქრობთ, რომ მთლიანობაში ეს არის უმნიშვნელოვანესი საქართველოს მომავალი განვითარებისთვის, სტაბილურობისთვის ჩვენს ქვეყანაში“, განაცხადა გიორგი კვირიკაშვილმა.