საქართველოს ყოფილი პრეზიდენტი მიხეილ სააკაშვილი მოსკოვის ყოფილი მერის, იური ლუჟკოვის საქართველოში ვიზიტს ეხმაურება.

სააკაშვილის თქმით, 2004 წელს მისი ხელისუფლების პირობებში, „ლუჟკოვსა და მის ამფსონებს ამოვუკვეთეთ ფეხი საქართველოდან", მისივე განცხადებით, დღევანდელი ხელისუფლების პირობებში კი, ლუჟკოვი „მიიღეს და უგალობეს კიდევაც".

„ლუჟკოვის ბრძანებით, 2009 წელს, ჩვენი რამდენიმე ათეული სოფლის გადამწვარი ნასახლარები მიწასთან გაასწორეს და ზედ "მოსკოვის რაიონი" დააშენეს, თავისი სამხედრო ყაზარმებით. უკვე მანამდე ბევრად ადრე, 2004 წლის აჭარის მოვლენების შემდეგ, ჩვენ ის პერსონა ნონ გრატად გვყავდა გამოცხადებული და რუსეთში მაშინდელი ოფიციალური ვიზიტების დროს, მასთან პროტოკოლით გათვალისწინებულ შეხვედრაზეც კი, ყოველთვის უარს ვამბობდი.

მე არ მიშვებენ ჩემს ქვეყანაში და საქართველოს დაუძინებელ მტერს ფეხქვეშ გაეგენ! სიმბოლურია, რომ ჩვენ ლუჟკოვს და მის ამფსონებს 2004 წლის 6 მაისს, გიორგობაზე ამოვუკვეთეთ ფეხი საქართველოდან, ამათ კი, იგივე დღეს, გიორგობაზე მიიღეს და უგალობეს კიდევაც! მურვან ყრუსაც უგალობებდნენ? შაჰ აბასსაც უგალობებდნენ? პუტინსაც უგალობებენ?" აღნიშნულია განცხადებაში, რომელიც ყოფილი პრეზიდენტის ოფიციალურ „ფეისბუქ" გვერდზე გავრცელდა.

იური ლუჟკოვი გასულ წლებში საქართველოს ოკუპირებულ რეგიონებში იმყოფებოდა, რითაც დარღვეული აქვს საქართველოს კანონი „ოკუპაციის შესახებ“. 

მოსკოვის ყოფილი მერი იური ლუჟკოვი უკვე ოთხი დღეა, რაც საქართველოში მეუღლესთან ერთად იმყოფება. იგი საქართველოში სომხეთიდან შემოვიდა. როგორც შს მინისტრის მოადგილემ, შალვა ხუციშვილმა განაცხადა, იური ლუჟკოვი საქართველოს საზღვარზე ლეგალური საბუთებით შემოვიდა, რის გამოც მესაზღვრეებს არ ჰქონდათ საფუძველი სხვა სახის გადაწყვეტილების მიღების.